चितवन (हाम्रो खेलकुद) – त्रिभुवन आर्मी क्लबलाई पराजित गर्दै अर्काे विभागीय टोली नेपाल पुलिस क्लबले अन्तर्राष्ट्रिय आमन्त्रण पुरुष भलिबल प्रतियोगिताको उपाधि जितेको छ ।

चितवनको रत्ननगरमा बिहीबार भएको उपाधि भिडन्तमा पुलिसले आर्मीलाई ३–१ को सेटमा पराजित गर्दै उपाधि जित्न सफल भएको हो । पुलिसले पहिलो सेट गुमाएपनि त्यसपछिको तीन सेटमा सफलता हात पारेको हो । पुलिसले पहिलो सेट १८–२५ ले गुमाएको थियो । दोस्रो २५–२३ ले जित्दै खेलमा पुनरागमन गरेको पुलिसले बाँकी दुई सेट २५–१८ र २५–११ ले जित्न सफल भयो ।

यससँगै पुलिसले आर्मीलाई लगातार तीन उपाधि भिडन्तमा पराजित गर्न सफल भयो । पुलिसले यसअघि माडीमा भएको खुल्ला पुरुष भलिबल र सभामुख कपमा आर्मीलाई पराजित गर्दै उपाधि जितेको थियो । उपाधिसँगै पुलिसले ३ लाख रुपैयाँ हात पार्यो । दोस्रो स्थानमा चित्त बुझाएको आर्मीले १ लाख ५० हजार रुपैयाँ पायो ।

पुलिसका रविन चन्द प्रतियोगिताको सर्वात्कृष्ट खेलाडी घोषित भए । उनले ७ हजार रुपैयाँ पाए । पुलिसका कप्तान इम बहादुर राना उत्कृट सेटर, पुलिसकै भीम गाहा उत्कृष्ट लिब्रो र पुलिसका चन्द्र कुवँर उत्कृष्ट प्रशिक्षक चुनिए । आर्मीका हरि अधिकारी उत्कृष्ट ब्लकर तथा धन बहादुर भट्ट उत्कृष्ट स्पाइकर चुनिए । उनीहरुले जनही ५ हजार रुपैयाँ पाए । प्रतियोगितामा दुई विदेशी टोलीसहित ९ टोलीको सहभागिता रहेको थियो ।