काठमाडौं (हाम्रो खेलकुद) – चौथो संस्करणको खुल्ला महिला भलिबल प्रतियोगिता वैशाख अन्तिम साता हुने भएको छ ।

आयोजक शेरबहादुर खड्का स्मृति प्रतिष्ठानले राजधानीमा पत्रकार सम्मेलनको आयोजना गर्दै चौथो संस्करणको राष्ट्रिय खुला महिला भलिबल प्रतियोगिता वैशाख २१ देखि २५ सम्म हुने जानकारी गराएको हो ।

प्रतियोगिता त्रिपुरेश्वरस्थित राष्ट्रिय खेलकुद परिषद् (राखेप) को कर्भड हलमा हुनेछ । प्रतियोगितामा डिफेन्डिङ च्याम्पियन नेपाल एपिएफ क्लब, उपविजेता शिवम् न्यु डायमण्ड एकेडेमी, नेपाल पुलिस क्लब, त्रिभुवन आर्मी क्लब, पश्चिमाञ्चल भलिबल टिम र जावलाखेल भलिबल ट्रेनिङ सेन्टरको सहभागिता रहने छ । प्रतियोगितामा सहभागिता जनाएका टिमलाई दुई समूहमा विभाजन गरी लिग कम नकआउटको आधारमा खेल खेलाइने आयोजकले जनाएको छ ।

पाँच दिनसम्म चल्ने प्रतियोगिताको विजेता टोलीले १ लाख ५० हजार, दोस्रो हुनेले १ लाख र तेस्रो हुने टोलीले ५० हजार रुपैयाँ प्राप्त गर्नेछन् ।प्रतियोगिताको सर्वोत्कृष्ट खेलाडीले १० हजार तथा विधागततर्फका उत्कृष्ट ब्लकर, उत्कृष्ट क्विकर, उत्कृष्ट सर्भर, उत्कृष्ट डिफेन्स, उत्कृष्ट लिबेरो तथा उत्कृष्ट प्रशिक्षकले जनही ५ हजार रुपैयाँ प्राप्त गर्ने छन् ।

प्रतियोगिताको समापनका अवसरमा शेरबहादुर खड्का स्मृति प्रतिष्ठानले एक खेलाडीलाई १० हजार नगद सहित ‘शेरबहादुर खड्का स्पेशल अवार्ड’ बाट पनि सम्मालित गर्नेछ । स्पेशल अवार्ड विजेता र सर्वोत्कृष्ट खेलाडीले सुलक्सबाट प्रायोजन गरिएको ३० हजार रुपैंया मुल्यको टिसर्ट र घडी प्राप्त गर्नेछन् ।