काठमाडौं (हाम्रो खेलकुद) – पाँचौ सशस्त्र प्रहरी महानिरीक्षक (एआइजी) खुल्ला महिला भलिबल प्रतियोगितामा साविकको विजेता शिवम् न्यु डायमण्ड एकेडेमी र उपविजेता नेपाल एपीएफ क्लबले विजयी शुरुवात गरेका छन् ।

सशस्त्र प्रहरी बलको मुख्यालय हल्चोकमा सोमबार भएको खेलमा शिवम् न्यु डाइमण्ड एकेडेमीले विभागी त्रिभुवन आर्मी क्लवलाई २५–१७, २५–१२ र २५–१५ को सोझो सेटमा पराजित गर्दै विजयी शुरुवात गरेको हो । सोमबारै भएको अर्काे खेलमा नेपाल एपीएफ क्लवले अर्काे विभागीय टोली नेपाल पुलिस क्लवलाई २५–२१, २५–१४ र २५–१८ को सोझो सेटमा पराजित गर्दै प्रतियोगितामा विजयी शुरुवात गर्न सफल भयो ।

लिगकम नकआउटको आधारमा संचालन भइरहेको प्रतियोगितामा आयोजक नेपाल एपीएफ क्लवको महिला भलिबल टिमसहित त्रिभुवन आर्मी क्लव, नेपाल पुलिस क्लव, शिवम् न्यु डाइमण्ड एकेडेमी, जावलाखेल भलिबल प्रशिक्षण केन्द्र र ढोरपाटन स्पोर्ट्स क्लव गरी कूल ६ वटा टिमको सहभागिता रहेको छ । प्रतियोगिताको विजेताले २ लाख ५० हजार, उपविजेताले १ लाख २५ हजार तथा तेस्रो हुने टिमले ५० हजार प्राप्त गर्ने छन् । विभिन्न विधामा उत्कृष्ट हुने खेलाडीहरुले जनही ५ हजार रुपैयाँ तथा प्रतियोगिताको सर्वोत्कृष्ट खेलाडीलाई पुरस्कारको रुपमा स्कुटर पाउने छ ।