काठमाडौं (हाम्रो खेलकुद) – तेस्रो संस्करणको प्रधान सेनापति राष्ट्रिय पुरुष भलिबल प्रतियोगिता आइतबारदेखि हुने भएको छ ।

आयोजक नेपाली सेनाले बिहिबार राजधानी पत्रकार सम्मेलनको आयोजना गर्दै प्रतियोगिता हुने जानकारी गराएको हो । प्रतियोगितामा ३ विभागसहित तत्कालीन ५ प्रदेशसहित ८ टिमको सहभागिता रहने आयोजक सेनाले जनाएको छ । प्रतियोगिता फागुन ६ गतेबाट १२ गतेसम्म लगनखेलस्थित सैनिक शारीरिक तथा खेलकुद केन्द्रको कवर्डहलमा हुनेछ । सहभागी टोलीलाई दुई समूहमा विभाजन गरिएको छ । हरेक समूहका शीर्ष दुई टोली क्वार्टरफाइनल प्रवेश गर्नेछन् ।

समूह ‘ए’ मा त्रिभुवन आर्मी क्लब, मध्य पश्चिमाञ्चल विकास क्षेत्र, सुदूर पश्चिमाञ्चल विकास क्षेत्र र विभागीय सशस्त्र प्रहरीको एपीएफ क्लब रहेका छन् । यस्तै समूह ‘बी’मा नेपाल पुलिस क्लब, मध्यमाञ्चल विकास क्षेत्र, पूर्वाञ्चल विकास क्षेत्र र पश्चिमाञ्चल विकास क्षेत्र रहेका छन् ।

प्रतियोगिताको पहिलो दिन दुई खेल हुनेछ । पहिलो खेलमा त्रिभुवन आर्मी क्लब र मध्यपश्चिमबीच खेल हुनेछ । दोस्रो खेलमा पूर्वाञ्चल र पश्चिमाञ्चलबीच खेल हुनेछ ।
जनसम्पर्क शाखाका प्रमुख महासेनानी विजय थापाले निकट भविष्यमै महिला भलिबल प्रतियोगिता आयोजना गर्न लागिएको बताए । प्रतियोगितालाई नेपाल भलिबल संघले प्राविधिक सहयोग गरेको छ ।

प्रतियोगिता लिग कम नकआउटको आधारमा हुने प्रतियोगिताको विजेताले ३ लाख रुपैया प्राप्त गर्नेछ । दोस्रो हुनेले १ लाख ५० हजार र तेस्रो हुनेले ७५ हजार प्राप्त गर्नेछ । यस्तै प्रतियोगिताको उत्कृष्ट स्पाइकर, ब्लकर, डिफेन्डर, लिफ्टर र प्रशिक्षकले समान १० हजार प्राप्त गर्नेछ । प्रतियोगितालाई नेपाल इन्भेष्टमेन्ट बैंकले मुख्य प्रायोजन बापत १५ लाख सहयोग गरेको छ । प्रतियोगिता सञ्चलन गर्न करिव १५ लाख खर्च हुने आयोजकले अनुमान गरेको छ ।
यसअघिको दुवै संस्करणमा नेपाली सेनाको त्रिभुवन आर्मी क्लब नै च्याम्पियन बनेको थियो ।