काठमाडौं (हाम्रो खेलकुद) – भक्तपुरको स्प्रिङडेल इङलिस स्कुल प्रथम प्याब्सन यू–१८ राष्ट्रिय भलिबल प्रतियोगिताअन्तर्गत महिलातर्फ क्वाटरफाईनलमा प्रवेश गरेको छ । महोत्तरीको भानुभत्त मेमोरियल स्कुललाई मंगलबार २–० को सोझो सेटमा हराउँदा स्प्रिङडेल अन्तिम आठमा पुगेको हो ।

स्प्रिङडेलले २५–१७,२७–२५ ले खेल आफ्नो पक्षमा पारेको थियो । स्प्रिङडेलले पुरुषतर्फ पनि काठमाडौको एन्जल्सहार्टलाई २–० ले हराउँदै अन्तिम १६ मा स्थान बनायो । नयाँ बसपार्कको ढोरपाटन स्पोर्टस टेनिङ सेन्टरमा जारी प्रचियोगितामा महिलातर्फ रुपन्देहीको एभरेष्ट बोडिङ स्कुल र दाङको श्रीगाँउ खेलकुद बिकास समिति समूह बिजेताको रुपमा प्रि क्वार्टरफाइनल पुगेका छन् ।

एभरेष्टले काठमाण्डौंको बिन्ध्याबासीनी एकेडेमीलाई २५–७ र २५–८ ले श्रीगाँउले माफलाई २५–७ र २५–५ ले हराएको थियो । पराजित भएपछि बिन्ध्याबासीनी र माफ अन्तिम १६ मा पुगे । निजी तथा आवसिय बिद्यालय संगठन (प्याब्सन) को मुख्य प्रायोजनमा सञ्चालन भएको प्रतियोगिताको पुरुषतर्फको अन्य खेलमा कञ्चनपुरको लिटिलबुद्ध, काठमाडौंको ढोरपाटन स्पोर्टस् क्लब र ग्लासियर कलेज, एड्भान्स एकेडेमी र श्री स्टारले सफलता हात पारेका छन् ।

मंगलवार लिटिल बुद्ध एकेडेमीले दोहोरो सफलता हात पादै समूह विजेताका रुपमा अघिल्लो चरण पुगेको छ । गुल्मी जिल्ला भलिबल संघलाई २५–२३ र २५–२२ ले हराएको लिटिल बुद्धले आरुणी स्कुललाई २५–१३ र २५–१७ ले पाखा लगायो । आरुणी स्कुल उपबिजेताको रुपमा अन्तिम १६ मा पुग्दा गुल्मी बहिरिएको छ ।

नेपाल विद्यालय भलिबल कमिसनको आयोजना सञ्चालन भएको प्रतियोगिताको महिला र पुरुष दुवैको विजेता टोलिले १ लाख, दोस्रो हुनेले ६० हजार, तेस्रोले ३५ हजार रुपैयाँ प्राप्त गर्नेछ । कात्तिक १९ गते सम्म चल्ने प्रतियोगिताको विधागत उत्कृष्ट खेलाडीले जनही ५ हजार रुपैयाँ पाउनेछन् ।