काठमाडौं (हाम्रो खेलकुद) – नेपाली युवा टोलीले काभा यु २० पुरुष भलिबल च्याम्पियनसिपको चौथो खेलमा किर्गिस्तानको सामना गर्दैछ ।

श्रीलंकाको कोलम्बो जारी प्रतियोगिताको आफ्नो चौथो खेलमा बिहीवार नेपालले किर्गिस्तानको सामना गर्दैछ । खेल नेपाली समय अनुसार साँझ ६ः१५ बजे सुरु हुनेछ । नेपाल तेस्रो जित प्रतासमा रहनेछ ।

३ खेलमा २ जित र १ हारका साथ नेपाल अंक तालिकाको तेस्रो स्थानमा छ । किर्गिस्तान समान खेलमा १ जितका साथ पाँचौ स्थानमा छ ।

पहिलो खेलमा नेपालले घरेलु टोली‌ श्रीलंकालाई ३-० को सोझो सेटमा पराजित गरेको थियो । नेपाल दोस्रो खेलमा भने उज्वेकिस्तानसॅंग ३-१ को सेटमा पराजित हुँदा तेस्रो खेलमा माल्दिभ्सलाई ३-० को सेटमा पराजित गरेको थियो । नेपालले पाँचौ तथा लिग चरणको अन्तिम खेलमा असोज २५ गते तुर्किमेनिस्तानसँग खेल्नेछ ।

प्रतियोगिताको शीर्ष दुईमा रहने टोलीबीच असोज २६ गते फाइनल हुनेछ । केहि महिनाअघि काठमाडौंमा‌ भएको यु १९ भलिबल च्याम्पियनसिपमा गरेको प्रदर्शनबाट खेलाडी छनोट गरिएको हो ।

सोही प्रतियोगिताको महिला प्रतियोगितामा भाग लिएर छनोट भएका टोलीले साउनमा माल्दिभ्समा भएको काभा यु २० च्याम्पियनसिपमा कास्य पदक जितेको थियो ।

नेपाली टोली – पहल गहतराज, सुरेश मल्ल, शैलेन्द्र यादव, सुर्य विक, अर्जुन नेपाली, विश्वास अधिकारी, सागर रसौली, अशोक राना, जित बहादुर सार्की, सुजन सुनार, लेसमन राहादी र दिपेश कुवँर।