एजेन्सी – ब्राजिलियन सुपरस्टार नेयमारले २ गोल गरेपछि प्रि सिजनको मैक्रीपूर्ण खेलमा बार्सिलोनाले युभेन्टसलाई २-१लो पराजित गरेको छ। अमेरिकामा खेलिएको खेलमा युभेन्टसका लागि एतमात्र गोल जिओर्जियो किएलिनिले गरेका थिए।

खेलको १५औं मिनेटमा बार्सिलोनाका नेयमारले टोलीलाई अग्रता दिलाएका थिए। उनले पाको अल्कासेरसँग बक्स बाहिरबाट उत्कृष्ट वन-टु पास खेल्दै सिक्स यार्ड बक्स अगाडीबाट गोल गरेका थिए। २६औं मिनेटमा व्यक्तिगत दोश्रो गोल गर्दै नेयमारले टोलीलाई २-०को अग्रता दिलाए। लियोनेल मेस्सीको पास पाएपछि नेयमारले बक्स भित्र रहेका ४ जना डिफेन्डरलाई छक्याउँदै दर्शनीय गोल गरेका थिए।

युभेन्टसले खेलको ६६औं मिनेटमा गोल फर्काउँदै खेलमा फर्कने प्रयास गरेको थियो। युभेन्टसका लागि किएलिनीले कर्नरमा हेडरमार्फत गोल गरेका थिए। तर, थप गोल हुन नसकेपछि खेलमा बार्सिलोना विजयी रह्यो।

पिएसजीले नेयमारलाई भित्र्याउन विश्व कीर्तिमानी रकम तयार पारिरहेको अवस्थामा यस प्रदर्शनले उनको महत्त्व थप बढी भएको छ। नेयमारले दुवै गोल उत्कृष्ट ढंगले गरेका थिए।