काठमाडौं (हाम्रो खेलकुद) – पौडीकी डुआना लामा र एलेक्स शाहले १३ औं दक्षिण एसियाली खेलकुद (साग) अन्तर्गत पहिलो दिन हिट चरणमा नै राष्ट्रिय किर्तिमान कायम गरेका छन् ।

सातदोबाटोस्थित इन्डोर स्विमिङ पुलमा १२ वर्षीय डुआनाले २ सय मिटर ब्रेस्टस्ट्रोकमा आफ्नै कीर्तिमान भंग गरेकी हुन् । उनले आठौं राष्ट्रिय खेलकुदमा राखेको २ मिनेट ५५.०९ सेकेन्डको कीर्तिमान सुधार्दै आज २ मिनेट ४८.५७ सेकेन्डमा दुरी पूरा गरिन् । उनी हिटमा दोस्रो स्थानमा रहँदै अन्तिम चरण प्रवेश गरकी छिन् ।

एलेक्सले भने २ सय मिटर फ्रीस्टाइलमा शिरिष गुरुङले कायम गरेको कीर्तिमान तोडेका छन् । एलेक्सले निर्धारित दुरी २ मिनेट २.३० सेकेन्डमा पूरा गरे । यसअघि शिरिषले सन् २०१४ को १२ औं फिना विश्वकपमा २ मिनेट ६.३५ सेकेन्डको कीर्तिमान राखेका थिए ।

नेपालले पहिलो दिनको आठ इभेन्टमध्य सबैको फाइनलमा प्रतिस्पर्धा गर्दैछ । चार स्पर्धामा हिट चरणको प्रतिस्पर्धा थियो भने चार स्पर्धामा सिधै अन्तिम चरणमा प्रतिस्पर्धा हुनेछ । अन्तिम चरण आज साँझ ४ बजेपछि इन्डोर स्विमिङ हलमा सुरु हुनेछ ।

पुरुष २ सय मिटर फ्रीस्टाइलमा एलेक्स शाहले प्रतिस्पर्धा गर्नेछन् । महिला २ सय मिटर फ्रीस्टाइलमा तिसा शाक्य र गौरिका सिंहले सिधै फाइनलमा खेल्दैछन् । पुरुषको २ सय मिटर ब्रेस्टस्ट्रोकमा विकास कुमाल र शुभम श्रेष्ठले प्रतिस्पर्धा गर्दा महिलातर्फ डुआना लामा र अदिप्षा वैधले खेल्नेछन् ।

पुरुष १ सय मिटर बटरफ्लाईमा शुभम श्रेष्ठ र हम्जा शाह तथा महिलातर्फ तिसा शाक्यले खेल्दैछिन् । रिलेतर्फ पनि दुवै पुरुष र महिलामा सातै राष्ट्रले प्रतिस्पर्धा गर्दैछन् ।