काठमाडौं (हाम्रो खेलकुद) – पेरिस ओलम्पिक २०२४ अन्तर्गत पौडीतर्फ नेपालकी डुआना लामाले निराशाजनक प्रदर्शन गरेकी छिन् ।

२ सय मिटर फ्रिस्टाइल विधाको पहिलो हिटमा उनले ७ खेलाडीमध्य अन्तिम स्थान हासिल गरिन् । उनले २ मिनेट २०.७४ सेकेन्डमा निर्धारित दुरी पार गरिन् । उनले आफ्नो २ मिनेट १२.४६ सेकेन्डको उत्कृष्ट प्रदर्शनलाई सुधार गर्न सकिनन् ।

त्यसअघि आइतबार नै सुटिङकी सुस्मिता नेपालले पनि खराब प्रदर्शन गरिन् । ४४ जनाले भाग लिएको १० मिटर एयर राइफलमा सुस्मिता ४२ औं स्थानमा आइन् । उनले ६ सय ७.८ स्कोर गरेकी थिइन् ।

शनिबार टेबल टेनिस स्यान्टु श्रेष्ठ र ब्याडमिन्टनका प्रिन्स दाहालले आ आफ्नो खेल गुमाएका थिए । दुवै सोझो सेटमा पराजित भए ।

समूह पीमा रहेका प्रिन्स विश्व वरियताको दोस्रो नम्बरमा रहेका डेनमार्कका भिक्टर एक्सेलसनसँग ८–२१ र ६–२१ को सेटमा पराजित भएका थिए । अब ब्याडमिन्टनको जुनियर विश्व वरीयताका पूर्व नम्बर एक भइसकेका प्रिन्स आयरल्यान्डका नियात नुयन (४३औं वरीयता) र इजरायलका मिसा जिल्वरमन (५९औं वरीयता) विरुद्ध खेल्नेछन् । प्रिन्स विश्व वरीयतामा १ सय ७२औं स्थानमा रहेका छन् ।

टेबल टेनिस खेलाडी स्यान्टु श्रेष्ठ पहिलो चरणबाटै बाहिरिएका थिए । सेनगलका खेलाडी इब्राहिमा डियावसँग ४–० ले पराजित भएका थिए । पहिलो सेटमा राम्रो प्रदर्शन गरेपनि उनले १०–१२ ले गुमाएका थिए । त्यसपछि उनी दोस्रो सेटमा ११–३, तेस्रो सेटमा ११–४ र चौथो सेटमा ११–५ ले पराजित भए ।

कुल ६ खेलका ७ नेपाली खेलाडीले पेरिस ओलम्पिकमा भाग लिइरहेका छन् । जुडोकी मनिता श्रेष्ठ प्रधान, एथलेटिक्सकी सन्तोषी श्रेष्ठ, पौडीका एलेक्स शाहले आ आफ्नो खेल खेल्न बाँकी छ ।