एजेन्सी – स्विट्जरल्यान्डका रोजर फेडेररले फाइनलमा क्रोएसियाका मारिन सिलीचलाई सोझो सेटमा पराजित गर्दै आठौं पटक प्रतिष्ठित ग्रयाण्डस्ल्याम प्रतियोगिता विम्बल्डनको उपाधि जितेका छन्। आफ्नो करियरको १९औं ग्रयाण्डस्ल्याम उपाधि जित्ने क्रममा उनले सिलीचलाई ६-३, ६-१ र ६-४ले पराजित गरेका थिए।

तस्बिर: रोएटर्स

३५ वर्षीय फेडेररले १ घण्टा ४१ मिनेट चलेको खेलमा एस प्रहार गर्दै उपाधि पक्का गरेका थिए। उनले सन् २०१२यता पहिलो पटक विम्बल्डनको उपाधि जितेका हुन्। यसअघि सन् १८८९मा विलियम रेन्स र सन् २०००मा पिट साम्प्रासले पनि सातौं विम्बल्डन उपाधि जितेका थिए। यद्दपी महिलातर्फ भने मारिना नाव्रातिलोभाले ९ पटक विम्बल्डनको उपाधि जितेकी छिन्।

फेडेरर यस जितसँगै १५ उपाधि जितेका राफेल नाडालभन्दा ४ उपाधिले अगाडी छन्। उनि टेनिस इतिहासमा समान १९ उपाधि जितेका हेलेन विल्स मुडीसँग समान चौथो स्थानमा रहेका छन्। शीर्षस्थानमा २४ उपाधि जितेका मार्गारेट कोर्ट रहेका छन्।