एजेन्सी – विश्व खेलकुदकै कुम्भमेला ओलम्पिकको ३२औं संस्करण शुक्रबारदेखि जापानमा टोकियो ओलम्पिक २०२० को नामबाट सुरु हुँदैछ ।

खेललाई उमेरले छेक्दैन । ओलम्पिकमा पनि यस्तो प्रशस्तै उदाहारण छन् । ओलम्पिकको इतिहासमा टिनएज नै नटेकेकादेखि अधिक उमेरसम्मका खेलाडीहरुले सहभागिता जनाउँदै कीर्तिमान राखेका छन् । यसपटक युद्धले ग्रस्त सिरियाकी टेबल टेनिस खेलाडी हेन्ड जाजा टोकियो ओलम्पिककै सबैभन्दा कान्छी खेलाडी बनेकी छिन् ।

१२ वर्षीय हेन्ड जाजा शुक्रबारदेखि सुरु हुने टोकियो ओलम्पिक २०२० मा सहभागिता जनाउने ११ हजार बढी एथलिटमा सबैभन्दा कान्छी खेलाडी बनेकी हुन् । सन् २०१६ को रियो ओलम्पिकमा नेपालकी जलपरी गौरिका सिंह सबैभन्दा कान्छी खेलाडी बनेकी थिइन् । उनी त्यतिबेला १३ वर्षको थिइन् ।

फेब्रुअरी २०२० मा एसियन छनोट चरणमा लेबानानकी ४२ वर्षिय मरियाना सहाकिनलाई पराजित गर्दै जाजाले टोकियो ओलम्पिकका लागि टिकट काटेकी थिइन् । जुन समय उनी मात्र ११ वर्षकी थिइन् । उनी सिरियाको राष्ट्रिय टेबल टेनिस उपाधि जित्ने खेलाडी हुन् ।

सिरियाको द्वन्द्वकालिन वातावरण र संकटकालका कारण राम्रोसँग प्रशिक्षण लिन नपाएपनि उनले टोकियो ओलम्पिकका लागि बन्द प्रशिक्षणका माध्यमबाट उनले आफुलाई तयार पारेकी हुन् । उनको लक्ष्य टोकियो ओलम्पिकमा राम्रो प्रदर्शन गर्नु नै रहेको छ ।

‘यो मेरो देश । मेरो परिवार र सम्पुर्ण साथीहरुको लागि मेरो तर्फबाट उपहार हो’ १२ वर्षीय जाजाले भनेकी छन्, ‘खेल मेरो रगतमा छ । मलाई मेरो परिवारको भरपुर साथ छ । म परिवारकोे खुसीको लागि सम्पुर्ण कुरा गर्न तयार छु ।’