एजेन्सी – एन्टोइन ग्रिजमन फेरि एकपटक चम्केका छन् । एथ्लेटिक क्लबविरुद्ध आइतबार बार्सिलोनाले २–१ को जित निकाल्दा ग्रिजमनको गोल निर्णायक बनेको थियो । उनी पछिल्ला केहि खेलमा लगातार उच्च प्रदर्शन गरिरहेका छन् ।

पछिल्लो एक महिनामा बार्सिलोनाका जितमा ग्रिजमन निकै व्यस्त छन् । उनले यो अवधिमा ५ गोल गर्नुका साथै ४ एसिस्ट गरेका छन् । बार्सिलोना पुगेयता ग्रिजमनको यो उच्च प्रदर्शन हो ।

सन् २०२१ मा ला लिगामा ग्रिजमन निकै लयमा देखिएका छन् । साथी खेलाडीका लागि पनि उनी प्रभावकारी हुँदै आएका छन् । ग्रानाडाविरुद्धको जितमा २ गोल गरेका ग्रिजमनले अर्को गोलका लागि सहयोगी भूमिका निर्वाह गरेका थिए ।

आइतबारको खेलमा उनले दोस्रो गोल गरेका थिए । त्यो टोलीको विजयी गोल थियो । २०२० को अन्त्यसँगै त्यसयता बार्सिलोनाले लगातार उच्च प्रदर्शन गरिरहेको छ ।

ग्रिजमनले कोपा डेल रे रायो भालेसानोविरुद्धको खेलमा लिओनल मेस्सीका लागि एसिस्ट गरेका थिए । स्पेनिस सुपर कप रियल सोसिडाडविरुद्ध एसिस्ट गरेका ग्रिमजनले एथलेटिकविरुद्धको फाइनलमा २ गोल गरेका थिए ।

ला लिगामा ५ जित

एथ्लेटिकलाई हराउँदै बार्सिलोना दोस्रो स्थानमा उक्लेको छ । त्यो जितसँगै समान ४० अंक भएपनि बार्सिलोनाले रियल म्याड्रिडलाई पछि पारेको छ । यद्दपी बार्सिलोना शीर्षस्थानको एट्लेटिको म्याड्रिड भन्दा टोली १० अंकले पछाडि छ ।

बार्सिलोना र रियलले भन्दा एट्लेटिकले १ खेल कम खेलेको छ । बार्सिलोनाले २०२१ को सुरुवात बलियो रुपमा गरेको छ । ला लिगामा पछिल्ला ५ खेलमा टोलीले सफलता हासिल गरेको थियो ।