एजेन्सी – यस वर्षको युएस ओपन टोनिसको महिला एकलतर्फको उपाधिका लागि बेलारुसका भिक्टोरिया एजारेन्का र जापानी नाओमी ओसाकाबीच प्रतिस्पर्धा हुने भएको छ ।

एजोरेन्काले अमेरिकी सेरेना विलियम्सलाई २–१ को सेटमा पराजित गर्दै फाइनलमा २०१८ की च्याम्पियन ओसाकासँगको भिडन्त पक्का गरेकी हुन् । ओसाकाले पनि अमेरिकी जेनिरफर ब्राडीलाई २–१ को सेटमा पराजित गर्दै फाइनलमा स्थान बनाएकी थिइन् । फाइनल शनिबार हुनेछ ।

न्युयोर्कमा शुक्रबा बिहान भएको खेलमा बेलारुसका अजरेन्काले पुर्व विश्व नम्वर एक तथा २३ पटकको ग्रान्डस्लाम च्याम्पियन सेरेनासँग पहिलो सेटमा पछि परेपनि त्यसपछिको दुवै सेट आफ्नो पक्षमा पार्दै फाइनलमा पुग्न सफल भएकी हुन् ।

दुई पटकको अष्ट्रेलियन ओपन च्याम्पियन अजरेन्काले पहिलो सेट १–६ ले गुमाएकी थिइन् । तर त्यसपछिको दुवै सेटमा अजारेन्का ६–३ र ६–३ ले विजयी भइन् । अजरेन्का २०१३ पछि पहिलोपटक कुनै पनि ग्रान्सस्लामको फाइनलमा प्रवेश गरेकी हुन् ।

यस्तै शुक्रबार बिहान नै भएको अर्काे सेमिफाइनलमा चौथो वरीयताकी २२ वर्षीय ओसाकाले अमेरिकी जेनिफर ब्राडीलाई २–१ को सेटमा पराजित गर्दै दुई वर्षपछि युएस ओपनको फाइनलमा स्थान बनाउन सफल भइन् ।

प्रतिस्पर्धात्मक बनेको पहिलो सेटमा ओसाकाले ७–६ को कठिन जित निकालेपनि दोस्रो सेट ३–६ ले गुमाएकी थिइन् । तर, तेस्रो तथा निर्णायक सेटमा ओसाकाले ६–३ को सहज जित निकाल्दै फाइनलमा स्थान बनाउन सफल भइन् । ओसाकाले २०१८ मा सेरेना विलियम्सलाई पराजित गर्दै पहिलो ग्रान्डस्लाम उपाधि जितेकी थिइन् ।