काठमाडौं (हाम्रो खेलकुद)– ब्याडमिन्टनका युवा स्टार प्रिन्स दाहाल काठमाडौंमा जारी प्रेसिडेन्ट कप नेपाल इन्टरनेशनल सिरिज २०२० को यू १९ को फाइनलमा पुगेका छन् ।

त्रिपुरेश्वरस्थित राष्ट्रिय खेलकुद परिषद् (राखेप) को कभर्ड हलमा भएको सेमिफाइनलमा प्रिन्सले भारतका अभिन बशिष्टलाई २–१ को सेटमा हराउँदै अन्तिम दुईको यात्रा तय गरेका हुन् । पहिलो सेट २१–१८ मा आफ्नो पक्षमा पारेका प्रिन्सले दोस्रो सेट २०–२२ ले गुमाएका थिए । अन्तिम तथा निर्णायक सेटमा २१–१७ को जित निकाल्दै उनी घरेलु कोर्टमा फाइनलमा प्रवेश गरको हुन् ।

खेलपछि प्रिन्सले केहि दबाबमा खेलेको स्वीकार गरे । ‘ घरेलु कोर्टमा राम्रो गर्दा उत्साह र खेल बिग्रदा दबाब हुने रहेछ , प्रिन्सले भने,‘ कन्ट्रोल गर्न नसक्दा अलि बढी चिप्लिए ।’ दोस्रो सेटमै जितको नजिक पुगेर उनले सेट गुमाएका थिए ।

जुनियरतर्फ विश्व वरियताको १४ औं स्थानमा रहेका प्रिन्सले विश्व वरियताको तेस्रो नम्बरमा रहेका भारतीय खेलाडी मिराबा लेवाङसँग उपाधिका लागि प्रतिस्पर्धा गर्नेछन् ।

जारी प्रतियोगिताको शीर्ष वरियतामा रहेका लेवाङले शुक्रबार नै अर्को सेमिफाइनलमा श्रीलंकाका दुमिन्दु अबेविक्रमालाई २१–१२,२१–८ ले हराएका थिए । प्रिन्स जारी प्रतियोगिताको एकलतर्फको वरियतामा दोस्रो स्थानमा छन् ।
सिरिजअन्तर्गत महिला एकलतर्फ भारतकी मिर तस्मिनले नेपालकी निता लम्बासलाई २१–९ र २१–९ को सोझो सेटमा हराउँदै फाइनलको यात्रा तय गरेकी छन् ।