काठमाडौं (हाम्रो खेलकुद)– दुबई इन्टरनेशनल सिरिजका विजेता ब्याडमिन्टनका युवा स्टार खेलाडी प्रिन्स दाहाल प्रथम प्रेसिडेन्ट कप नेपाल जुनियर इन्टरनेशनल सिरिजमा विजयी सुरुवात गर्न सफल भएका छन् ।

त्रिपुरेश्वरथित राखेप कभर्डहलमा बुधबार प्रिन्सले भारतका आर। बिकास प्रभुलाई २१–१५, ७–२१, २१–१४ को जित निकाल्दै पुरुष एकलतर्फ सेमिफाइनल यात्रा तय गर्न सफल भए । नरेन्द्र बमले भने भारतका नितिन कुमारबाट वाक ओभर प्राप्त गरे ।

यु–१९ को मात्र प्रतिस्पर्धा रहेको प्रतियोगितामा प्रिन्सले जित निकाल्दै गर्दा अन्य नेपाली खेलाडीहरुले भने उनलाई पछ्याउन सकेनन् । पुरुष एकलतर्फ जेबि साउद भारतका खेलाडी शिभम कुमार मिश्रसँग २१–१६ र २१–११ ले पराजित भए ।

प्रियान्शु सिंह क्षेत्री श्रीलंकाका दुमिन्दु अवेविक्रमासँग २१–१३ र २१–१४ ले, पेम्बा शेर्पा श्रीलंकाकै दिगायु कहातापितिया संग १७–२१, २१–८ र २२–२० को प्रतिस्पर्धात्मक खेलमा पराजित भए ।

यस्तै गोकुल जोरा भारतका अभिन बशिष्ठसँग २१–९ र २१–९ को समान अन्तरले तथा अमृत चौधरी भारतका आयान रशिद संग २१–८ र २१–७ को सोझो सेटमा पराजित हुँदै प्रतियोगिताबाट बाहिरिए ।

महिला एकलतर्फ पनि नेपाली खेलाडीहरुले पहिलो चरण पार गर्न सकेनन् । प्रसुना खत्री मलेसियाकी श्रन्या कबिलान संग २१–१० र २१–९ ले तथा बिष्णा बिष्ट भारतकी अनुपमा उपाध्यायसंग २१–४ र २१–६ ले पराजित हुन पुगिन् ।