काठमाडौं (हाम्रो खेलकुद) – नेपालको दोस्रो वरीयताका दिपेश धामी पाकिस्तानमा जारी योनेक्स सनराइज पाकिस्तान इन्टरनेसनल ब्याडमिन्टन सिरिजको पुरुष एकलको क्वाटरफाइनलमा प्रवेश गरेका छन् ।

पाकिस्तान स्पोर्टस् कम्प्लेक्समा शुक्रबार भएको प्रि–क्वाटरफाइनल खेलमा धामीले पाकिस्तानकै मोहम्मद अली लारोसलाई २–० को सोझो सेटमा पराजित गर्दै अन्तिम आठको यात्रा तय गरेको हो । प्रतिस्पर्धात्मक बनेको पहिलो सेटमा दिपेशले २१–१९ को तथा दोस्रो सेटमा २१–११ को सहज जत हात पारेको थियो ।

अब धामीले सेमिफाइनल प्रवेशका लागि आजै अफ्रिकन राष्ट्र मौरीटियसका जर्ज जुलियन पउलसँग खेल्नेछ ।  त्यसअघि दिपेशले पाकिस्तानकै हुसेन साहिदाइृ २१–७ र २१–११ को सेटमा पराजित गर्दै प्रि–क्वाटरफाइनलमा स्थान बनाएको थियो । नेपाल नम्वर वान रत्नजित तामाङ र बिकास श्रेष्ठ पहिलो खेलमै निराश बने ।

महिला एकलमा नेपालका अनुमाया राई प्रि–क्वाटरफाइनलमा तथा अमिता गरी पहिलो खेलबाट अघि बढ्न सकेन । मिक्स डबल्समा रत्नजित तामाङ र अनुमायाको जोडी पाकिस्तानी जोडीसँग २१–१५ र २१–१४ को सेटमा तथा महिला डबल्समा अनुमाया राई र अमिता गिरीको जोडी पाकिस्तानी खेलाडीसँग नै पराजित भइन् ।

रत्नजित र दिपेशको जोडीले मेन्स डबल्समा आजै पाकिस्तानी जोडीसँग खेल्नेछ । दिपेश र अनुमाया राईको जोडीले आजै मिक्स डबल्स्मा माल्दिभ्सका खेलाडीसँग प्रतिस्पर्धा गदर्दैछ ।