काठमाडौं (हाम्रो खेलकुद)– युवा ब्याडमिन्टन स्टार प्रिन्स दाहालले दक्षिण एसिया जुनियर यू २१ ब्याडमिन्टन च्याम्पियनसिपमा रजत पदक जितेका छन् । माल्दिभ्समा जारी च्याम्पियनसिमा बिहीबार मेन्स सिंगलको फाइनलमा तेस्रो वरियताका भारतीय सारथ डुन्नासँग प्रिन्स २–० ले पराजित भएका थिए ।

मंसिरमा स्वदेशमा आयोजना हुने १३ औं दक्षिण एसियाली खेलकुद (साग) का लागि समेत छनोट भइसकेका प्रिन्स २१–१४ र २१–१६ ले पराजित भएका थिए । प्रिन्सले पछिल्लो केहि वर्षयता जुनियर र सिनियर स्तरमा उच्च प्रदर्शन गर्दै आइरहेका छन् ।

माल्दिभ्स जानुअघि मात्र पनि उनले अन्नपूर्ण अन्तर्राष्ट्रिय ब्याडमिन्टन सिरिजमा कास्य पदक जितेका थिए । त्यो सिरिजमा कास्य पदक जित्ने प्रिन्स एकमात्र नेपाली हुन् । त्यसअघि उनले दुवई ओपनमा यू १९ च्याम्पियनसिपमा जितेका थिए ।

त्यसअघि प्रिन्स सम्मलित नेपाली टोलीले च्याम्पियनसिपको मिक्स टिममा कास्य पदक जितेको छ । नेपाली टोली भारतसँग ३–२ ले पराजित हुँदै फाइनल पुग्नबाट बञ्चित भएको थियो । त्यसअघि बंगलादेश र माल्दिभ्सलाई समान ३–२ ले हराउँदै नेपाली टोली सेमिफाइनल पुगेको थियो ।

प्रिन्ससहित टोलीमा प्रिन्स दाहाल, प्रफुल महर्जन, रुकेश मर्हजन, रसिला मर्हजन, जेसिका गुरुङ र सिमा राजवंशी छन् । टोलीको प्रशिक्षकमा किरण थापा र व्यवस्थापकमा नेपाल ब्याडमिन्टन संघका सचिव नविनविक्रम शाह छन् ।