काठमाडौं (हाम्रो खेलकुद)– दुई महिनापछि स्वदेशमा आयोजना हुने १३ औं दक्षिण एसियाली खेलकुद (साग) का लागि नेपाल ब्याडमिन्टन संघले बुधबार खेलाडी छनोट गरेको छ । राष्ट्रिय खेलकुद परिषद्को कभर्डहलमा भएको छनोट प्रतियोगिताबाट १० पुरुष र १० महिला खेलाडी छनोट गरिएको संघका सचिव नविनबिक्रम शाहले जानकारी गराए । 

वैशाखमा सम्पन्न आठौं राष्ट्रिय खेलकुदबाट पहिलो चरणमा छनोट भएका १७ पुरुष र १७ महिला खेलाडीहरुलाई बन्द शिविरमा राखी प्रशिक्षण दिँदै आएकोमा अन्तिम चरणका लागि समान १० खेलाडी छनोट गरिएको हो ।

सागका लागि महिलातर्फ रशिला महर्जन, नङ्शलदेवी तामाङ, जेशिका गुरुङ, सिमा राजवंशी, पुजा श्रेष्ठ, अनुमाया राई, अमिता गिरी, सीता राई, निता लम्साल र शोभा गौचन छनोट भएका छन् ।

सोमबार सुरु भएको छनोट प्रतियोगिताबाट पुरुषतर्फ दिपेश धामी, रत्नजित तामाङ, विकास श्रेष्ठ, प्रिन्स दाहाल, नविन श्रेष्ठ, प्रफुल महर्जन, सुनिल जोशी, बिष्णु कटुवाल, जीवन आचार्य र साजन कृष्ण ताम्राकार छनोट भएका छन् ।

खेलाडीहरुलाई साग प्रतियोगिताको तयारीका क्रममा बाँकी समय पोखरामा बन्द प्रशिक्षण दिइने छ । बन्द प्रशिक्षण असोज २३ गतेबाट पोखरा सुरु हुने मुख्य प्रशिक्षक सुदिप योन्जनले जानकारी गराए । मंसिर १५ देखि २४ गते सम्म आयोजना हुने १३ औं सागमा ब्याडमिन्टनको प्रतिस्पर्धा पोखरा रंगशालास्थित बहुउद्देश्यीय कभर्डहलमा हुने तय छ ।