काठमाडौं (हाम्रो खेलकुद)- चीनको नानिङ शहरमा जारी टोटल बिडब्लुएफ सुदिरमान कप–२०१९ मा नेपालले लगातार तेस्रो हार बेहोरेको छ । टोटल बिडब्लुएफ सुदिरमान कप–२०१९ मा डेब्यु खेल खेलिरहेको नेपाल तेस्रो खेलमा न्युजिल्यान्डसँग ४–१ ले पराजित भएको हो ।

यसअघि नेपाल पहिलो खेलमा आयरल्यान्डसँग ५–० ले तथा अष्ट्रेलियासँग ३–२ ले पराजित भएको थियो । बुधबार भएको मिक्स टिम च्याम्पियनसिप अन्तरगत ५ विधाको पुरुष एकलमा नेपालका शीर्ष वरीयताका रत्नजित तामाङले मात्रै जित हात पार्दा अन्य चार विधा महिला एकल, पुरुष डबल्स्, महिला डबल्स् र मिक्स डबल्स् सबैमा पराजित हुन पुग्यो ।

रत्नले इडवार्ड लोउमाथि २१–१० र २४–२२ को जित निकालेको थियो । पुरुष डबल्समा रत्न र दिपेश धामीको जोडी ओलिभर ेडेन डेभिस र अभिनभ मनओटासँग २–१ को सेटमा पराजित भयो । पहिलो सेट १९–२१ ले गुमाएको रत्न र दिपेशको जोडीले दोस्रो सेट २३–२१ ले जित्दै खेललाई १–१ को बराबरीमा ल्याएको थियो । तर, तेस्रो सेटमा २१–१३ ले सहजै पराजित हुन पुग्यो ।

मिक्स डबल्स्मा दिपेश धामी र अमिता गिरीको जोडी ओलिभर लेडन डेभिस र अनोना पाकको जोडीसँग २१–७ र २१–७ ले पराजित भयो । महिला एकलमा नङ्सलदेवी तामाङ सल्ली फुसँग २३–२१ र २१–१२ ले पराजित भइन् । महिला डबल्स्मा अमिता गिरी र नङ्सलको जोडी एल्यासा ट्याग्ली र जस्टिन भिलेगाससँग २१–१७ र २१–१५ ले पराजित भयो ।

यससँगै नेपाल ५ सिरिजको खेलको तीन चरणको खेल सकिदा नेपाल ३–० ले पछि परेको छ ।
नेपाली टोलीले मिक्स टिम च्याम्पियनसिप अन्तरगतको ५ विधामा प्रतिस्पर्धा गर्नेछ । जसमा पुरुष एकल, महिला एकल, पुरुष डबल्स्, महिला डबल्स् र मिक्स डबल्स् रहेका छन् । एक राष्ट्रले पाँचै विधामा प्रतिस्पर्धा गर्नुपर्नेछ ।