काठमाडौं (हाम्रो खेलकुद) – चीनको नानिङ शहरमा शुरु भएको टोटल बिडब्लुएफ सुदिरमान कप–२०१९ मा नेपालले कमजोर सुरुवात गरेको छ ।

टोटल बिडब्लुएफ सुदिरमान कप–२०१९ मा डेब्यु खेल खेलिरहेको नेपाल पहिलो खेलमा आयरल्यान्डसँग ५–० ले पराजित भएसंगै कमजोर सुरुवात गरेको हो ।

मिक्स डबल्स्मा दिपश धामी र अमिता गिरीको जोडी चोले मागी र साम मागीको जोडीसँग २१–६ र २१–४ ले पराजित भयो । पुरुष एकलमा नेपाल नम्वर वान रत्नजित तामाङ नाथ न्युहेनसँग २१–१२ र २१–१४ को सेटमा पराजित हुदा महिला एकलमा नङ्सलदेवी तामाङ काटे फ्रस्टसँग २१–१९ र २१–९ ले पराजित हुन पुग्यो ।

पुरुष डबल्स्मा रत्न र दिपेशको जोडी साम मागे र नाथ न्युहेनको जोडीसँग २१–१६ र २१–१६ ले पराजित भयो । महिला डबल्स्मा नङ्सदेवी तामाङ र अमिता गिरीको जोडी रचेल डराग र काटे फ्रस्टको जोडीसँग २१–२ र २१–५ को सोझो सेटमा पराजित भयो ।

शीर्ष वरीयताका रत्नजित तामाङले यति ठुलो स्टेजमा खेल्न पाउनु नै ठुलो कुरा रहेको बताए । उनले यस्ता ठुला प्रतियोगिताले अनुभव बढ्दै जाने र आगमी दिनमा राम्रो खेल्न हौसला मिल्ने बताए । यस्तै दोस्रो वरीयताका दिपेश धामीले यो प्रतियोगिता नेपालको लागि पहिलो रहेकाले यहाँबाट धेरै कुराहरु सिकेर जाने बताएका छन् ।

नेपालले अब मंगलबार न्युजिल्यान्डसँग तथा बुधबार अष्ट्रेलियासँग प्रतिस्पर्धा गर्दैछ ।
प्रतियोगिताका लागि चार खेलाडी र दुई अफिसियलसहितको ६ सदस्यीय नेपाली टोली शुक्रबार त्यसतर्फ प्रस्थान गरेको थियो ।

नेपाली टोलीले मिक्स टिम च्याम्पियनसिप अन्तरगतको ५ विधामा प्रतिस्पर्धा गर्नेछ । जसमा पुरुष एकल, महिला एकल, पुरुष डबल्स्, महिला डबल्स् र मिक्स डबल्स् रहेका छन् ।

एक राष्ट्रले पाँचै विधामा प्रतिस्पर्धा गर्नुपर्नेछ । पाँच मध्ये ३ विधामा खेलमा जित हात पारे टोली च्याम्पियन बन्नेछ ।