काठमाडौं (हाम्रो खेलकुद) – नेपाल नम्वर एक रत्नजित तामाङ चीनको वुहानमा सञ्चालन भैरहेको ब्याडमिन्टन एसिया २०१९ को दोस्रो चरणमा प्रवेश गरेका छन् ।

रत्नले पुरुष एकलको पहिलो खेलमा लाओसका नमवुन लुआङ्गामाथमाथि २–१ को जित निकाल्दै दोस्रो चरणमा प्रवेश गरेका हुन् । रत्नले पहिलो सेटमा २१–१५ को जित निकाले पनि दोस्रो सेट १९–२१ ले गुमाएको थियो । तर, तेस्रो सेट रत्नले २१–१२ ले सहजै जिन्त सफल भएको थियो ।

राष्ट्रिय प्रतियोगिताको थकान मेट्न नपाउदै चीन पुगेका रत्नले पहिलो खेलमै जित हात पारेका हुन् । ब्याडमिन्टन एसियामा रत्नसँगै दोस्रो वरीयताका दिपेश धामी पनि छन् । रत्नले पुरुष एकल र पुरुष डबल्समा प्रतिस्पर्धा गर्नेछ । रत्नलाई दिपेशले पुरुष डबल्समा साथ दिनेछ ।

दुवै दाङको घोराहीमा सम्पन्न आठौं राष्ट्रिय खेलकुद अन्र्तगत ४०औं राष्ट्रिय ब्याडमिन्टन च्याम्पियनसिप लगत्तै चीन प्रस्थान गरेका थिए । आठौंमा दिपेशले रत्नजितलाई पराजित गरेका थिए ।

राष्ट्रिय प्रतियोगिता पश्चात ब्याडमिन्टनका रत्नजित र दिपेशसँगै प्रिन्स दाहाल अन्तर्राष्ट्रिय प्रतियोगिताको लागि बाहिर छन् । प्रिन्स सिंगा–रोजा बिटीवाई जुनियर इन्टरनेशनल च्यालेन्ज २०१९ का लागि थाइल्यान्डमा छन् ।

ब्याडमिन्टन एसिया च्याम्पियनसिप एसियाको ब्याडमिन्टनको सबैभन्दा ठुलो प्रतियोगिता हो । रत्न र दिपेशले वाइल्ड कार्डमार्फत च्याम्पिययनसिपमा प्रवेश पाएका थिए ।