काठमाडौं (हाम्रो खेलकुद) – नेपाल नम्वर एक त्रिभुवन आर्मी क्लबका रत्नजित तामाङ र एपीएफका साजनकृष्ण ताम्राकार १४ औं राष्ट्रव्यापी कृष्ण मोहन स्मृति खुुल्ला ब्याडमिन्टन प्रतियोगिता अन्तर्गतको पुरुष एकलतर्फ क्वार्टरफाइनलमा प्रवेश गरेका छन् ।

आर्मीका रत्नजितले कैलालीका देवराज रानालाई २१–१२ र २१–१२ ले पराजत गर्दै क्वार्टरफाइनलमा स्थान बनाउदा एपीएफका साजनकृष्ण ताम्राकारले एपीएफकै इन्द्र बहादुर महतोलाई २१–१४ र २१–१० ले पराजित गर्दै अन्तम आठमा स्थान बनाएका हुन् । आर्मीकै प्रज्वल महर्जनले एपीएफका सुदिप सेढाँईलाई २१–११ र २१–१९ ले, भोजपुरका विकास श्रेष्ठले एपीएफका गौतम कठायतलाई २१–१९ र २१–१९ ले, दार्चुलाका प्रिन्स दाहालले नेपाल पुलिस क्लबका दिपक बोहोरालाई २१–७ र २१–१७ ले तथा त्रिभुवन आर्मी क्लबका नविन श्रेष्ठले नेपाल पुलिस क्लबका जीवन आचार्यलाई २१–१२ र २१–१६ ले पराजित गर्दै क्वार्टरफाइनलमा स्थान बनाए ।

महिला युगलततर्फ झापाकी सानुमाया मुखिया र जेसिका गुरुङको जोडी, आर्मीकी अमिता गिरी र रशिला महर्जनको जोडी र एपीएफकी पुजा श्रेष्ठ र शिक्षा श्रेष्ठको जोडीले आ–आफ्नो प्रतिद्धन्द्धीलाई पराजित गर्दै सेमिफाइनलमा स्थान बनाउन सफल भईन् । आर्मीकी नङ्सलादेवी तामाङ र अनुमाया राईको जोडीले एपीएफकी सीता दाहाल र ज्ञानु लिम्बुको जोडीबाट वाक ओभर पाए । ४५ वर्षमाथि भेन्ट्रान्स युगलतर्फ जेष्ठ व्याडमिन्टन एकेडेमीका प्रेम घले र उमेश केसीको जोडी, काठमाडौंका राजु महर्जन र सुनिल बज्राचार्यको जोडी विजयी भए ।

१० इभेन्ट्स समावेश ब्याडमिन्टन प्रतियोगितामा ४३ महिलासहित कूल २४५ जना खेलाडीहरुको सहभागिता रहेको छ । ब्याडमिन्टनतर्फ पुरुष एकलको विजेताले ६० हजार, दोस्रोले ३० हजार र तेस्रोले २५ हजार पाउनेछन् । क्वाटरफाइनलमा पुग्ने प्रत्येकले ५ हजार रुपैयाँ प्राप्त गर्नेछन् । महिला एकलको विजेताले ५० हजार, दोस्रोले २५ हजार र तेस्रो हुनेले १२ हजार ५ सय प्राप्त गर्नेछन् । पुरुष युगलको विजेताले ६० हजार, उपविजेताले ३० हजार तथा तेस्रो हुनेले २५ हजार प्राप्त गर्नेछन् । यसैगरी महिला युगलको विजेताले ४० हजार, दोस्रोले २५ हजार तथा तेस्रो हुनेले २० हजार प्राप्त गर्नेछन् ।

प्रतियोगिताका खेलहरु सशस्त्र प्रहरी बल नेपाल प्रधान कार्यालय हल्चोक स्वयम्भुस्थित एपीएफ क्लब हल, लनटेनिस कोर्ट, भलिबल कोर्ट र सातोबाटोस्थित लनटेनिस कोर्टमा संचालन भइरहेका छन् ।