काठमाडौं

काठमाडौं जिल्ला ब्याडमिन्टन संघले खेलाडी उत्पादनको उद्देश्यका साथ अर्को महिना स्कुल ब्याडमिन्टन च्याम्पियनसिपको आयोजना गर्ने भएको छ ।

हिमालयन ब्याडमिन्टन क्लब र विद्या संस्कार स्पोर्टस क्लबसँगको सहकार्यमा आयोजना हुने प्रतियोगितामा छात्र छात्रा यू–१२ र यू १४ को अलग अलग प्रतिस्पर्धा हुनेछ ।

प्रतियोगिता राष्ट्रिय खेलकुद परिषद्को कर्भड हलमा फागुन ८ देखि १० गते सम्म हुनेछ । काठमाडौं जिल्ला ब्याडमिन्टन संघका अध्यक्ष दीपक थापाले खुला अव्हान गरिएको प्रतियोगिता जो कोहीले भाग लिन सक्ने बताए । थापाका अनुसार काठमाडौं बाहिरका खेलाडीले सम्बन्धित जिल्ला ब्याडमिन्ट संघमार्फत सहभागी जनाउन पाउनेछन् ।

ब्याडमिन्टन प्रतिभाको खोजी र त्यसबाट छनोट भएका खेलाडीलाई एक बर्षसम्म प्रशिक्षण दिइने दिइनेछ । प्रशिक्षक टोलीले प्रतियोगिताबाट छात्रबृतिका लागि खेलाडी छनोट गर्नेछन् । त्यो प्रतियोगिताबाट छनोट हुने खेलाडीलाई भारतको उत्तर प्रदेशमा रहेको बाबु बनारसी दास ब्याडमिन्टन एकेडेमीमा समेत छात्रबृतिको लागि पहल हुने अध्यक्ष थापाले बताए ।

तीन दिने प्रतियोगितामा २ सय विधार्थीको सहभागिता रहने जिल्ला संघले विशवास लिएको छ । झन्डै १२ लाख रुपैयाँ खर्च हुने प्रतियोगिताका विजेता खेलाडीका प्रशिक्षकलाई समेत नगद पुरस्कार प्रदान गरिनेछ ।

‘एउटा खेलाडीलाई विजेता सम्म बनाउन प्रशिक्षकको त्यत्तिकै महत्वपूर्ण भूमिका हुन्छ,’ थापाले भने,‘प्रशिक्षकको त्यहि मेहनतको कदर स्वरुप यू १२ को विजेता खेलाडीको प्रशिक्षकलाई १२ र १४ को विजेता खेलाडीको प्रशिक्षकलाई १४ हजार रुपैयाँ दिइनेछ ।’ पुराना खेलाडी त्रिरत्न मानन्धरको ४ लाख र अन्यबाट प्राप्त गरि कुल ७ लाख रुपैयाँको काठमाडौं जिल्ला ब्याडमिन्टन संघको नाममा रहेको अक्षय कोषको ब्याजबाट आउने रकमबाट विजेता खेलाडीलाई पुरस्कृत संघले जनाएको छ । नेपाल ब्याडमिन्टन संघका महासचिव रामजीबहादुर श्रेष्ठले कुनै पनि खेलाडी विद्यालयस्तरबाट उत्पादन हुने बताए ।