सुमन अधिकारी, बुटवल

बुटवल ब्याडमिन्टन क्लबको आयोजनामा तेस्रो राष्ट्रिय ब्याडमिन्टन प्रतियोगिता बिहीवार सुरु भएको छ ।

३ दिनसम्म चल्ने प्रतियोगितामा विभागीय टोलीसँगै एक सय टिमका करिब २ सय खेलाडीको सहभागिता रहेको क्लबका सचिव भानु केसीले जानकारी दिए ।

प्रतियोगिताको पहिलो दिन मेन्स डबल्स र भेट्रानका केहि खेल भएका छन् । शुक्रवार मेन्स तथा वुमन्स सिंगलका खेलहरु खेलाइने जनाइएको छ ।

विभिन्न ६ विधामा सञ्चालन हुने प्रतियोगितामा मेन्स सिंगल र मेन्स डबल्सको जोडीको विजेताले ५०, दोस्रोलाई ३० र तेस्रो २० हजार रुपैयाँबाट पुरस्कृत गरिने छ ।

यसैगरि उमन्स सिंगलको विजेता ३०, दोस्रोले २० र तेस्रोले १० हजार रुपैयाँ प्राप्त गर्नेछन् । भेट्रान्स ४५ प्लस डबल्सको विजेता जोडीले ४०, दोस्रोले ३० र तेस्रोले २० हजार रुपैयाँ प्राप्त गर्नेछ।

यसैगरि भेट्रान्स ५५ प्लस डबल्स जोडीले २० , दोस्रोले १५ र तेस्रोले १० हजार रुपैयाँ प्राप्त गर्नेछ। त्यस्तै मास्टरतर्फको विजेताले १५, दोस्रोले १० र तेस्रोले ५ हजार रुपैयाँले पुरस्कृत गरिने छ ।

क्लबका अध्यक्ष पंकज ज्ञवालीको अध्यक्षतामा भएको समारोहमा बुटवल उपमहानगरपालिकाका मेयर खेलराज पाण्डेयले उद्घघाटन गरे ।

सोही अवसरमा नेपालमा ब्याडमिन्टन खेलको विकास र विस्तारमा महत्वपूर्ण योगदान पुर्याएका ८१ बर्षिय खेलाडी कुमार मोहन विक्रम शाहीलाई सम्मान गरिएको थियो ।