काठमाडौं (हाम्रो खेलकुद)- ग्लोबल टेबलटेनिस एकेडेमीका अर्नव चन्द्र र आयोजक ललितपुर टेबलटेनिस क्लबकी आरती चौधरीले सातौं सम्झना कप अन्तर्राष्ट्रिय टेबल टेनिस प्रतियोगितामा सिंगल्स उपाधि जितेका छन् ।

लैनचौरस्थित राष्ट्रिय टेबलटेनिस प्रशिक्षण केन्द्रमा भएको शनिवार भएको पुरुष फाइनलमा अर्नवले टिस्टा टोर्सा टेबलटेनिस एकेडेमीका शिर्ष रोय पत्वारीलाई ७–११, ११–७, ११–४ र ११–५ को सेटमा पराजित गरे ।

महिलाको फाइनलमा आरतीले ग्लोबलकी अनन्य सन्त्रलाई ११–८, ११–४ र ११–५ को सोझो सेटमा हराइन् । दुवैमा शीर्ष विजेताले ५० हजार, दोस्रोले २५ हजार र तेस्रोले‌ समान १० हजार रुपैयाँ प्राप्त गरे।

सम्झना ल्याबोरेटरी क्लिनिक प्रा.लि. को मुख्य प्रायोजनमा भएको प्रतियोगिताको भेट्रान ५५ वर्षमाथि पुरुष सिंगल्समा दार्जिलिङ टेबल टेनिस एसोसिएसनका कुना बोसले आयोजक ललितपुरका कपिल कुमारलाई ९–११, ११–९, ११–७ र ११–६ को सेटमा पाखा लगाउँदै पहिलो भए ।

४० वर्षमाथि पुरुष सिंगल्समा दार्जिलिङका तानमोय दत्तले खोल्चपुखका समिप श्रेष्ठलाई सिधा सेटमा ११–९, ११–७ र ११–६ ले फाइनलमा पन्छ्याउदै शीर्ष स्थानमा रहे ।

विजेतालाई ललितपुर महानगरपालिका प्रवक्ता एवं वडा ९ का अध्यक्ष राजु महर्जन, मुख्य प्रायोजक सम्झनाकी प्रबन्ध निर्देशक रजना जोशी, टेबलटेनिसका मुख्य प्रशिक्षक मोहनदास बासुकलालगायतले पुरस्कृत गरे ।

सोहि अवसरमा दक्षिण एसियाली खेलकुदअन्तर्गत टेबलटेनिसको महिला टिम इभेन्टतर्फ स्वर्ण विजेता मध्येकी एक गीता क्षेत्रीलाई ‘लाइफ टाइम्स एचिभ्मेन्ट’ अवार्डबाट सम्मान गरिएको थियो ।

६ दिने प्रतियोगितामा ४ सय २ खेलाडीले विभिन्न ९ स्पर्धामा प्रतिस्पर्धा गरेको प्रतियोगिता संयोजक निकेश जोशीले जनाएका छन् । प्रतियोगितामा ५ लाख २३ हजार रुपैयाँ रहेको थियो ।