सुमन अधिकारी, बुटवल

सातौं बुटवल खुल्ला लन टेनिस प्रतियोगिताको मेन्स सिंगलको फाइनलमा नेपालका नम्बर वनका प्रदिप खड्का र बुटवलका रितिक रानाबिच प्रतिष्पर्धा हुने भएको छ ।

प्रदिप र रितिकबिच यो चौथौ फाइनल भिडन्त हो । यसअघि काठमाण्डौमा गणेशमान ओपन टेनिस, सिटिजन ओपन टेनिस र पोखरामा माछापुच्छ्रेको फाइनल खेलेका थिए।

पहिलो सेमिफाइनलमा प्रदिपले निहाल जेवी थापालाई ६–४, ६–० र दोस्रोमा रितिकले निशान्त श्रेष्ठलाई ६–३, ६–४ को सेटमा पराजित गर्दै फाइनल भिडन्त पक्का गरेका हुन् ।
मेन्स ५५ प्लस सिंगलमा चन्द्र शाहीले उपाधि जितेका छन्। चन्द्रले फाइनलमा उत्तम बोगटीलाई ६–०, ६–१ को सेटमा पराजित गर्दै उपाधि जिते ।

यसैगरि ६५ प्लस सिगलमा भिक्टर राणाले अब्दुल सहमतलाई ६–३, ७–६ को सेटमा पराजित गर्दै उपाधि जितेका छन् ।

यसैगरि खुला डबल्सको उपाधि आयुषमान घले र निशान्त श्रेष्ठको जोडीले जितेको छ । फाइनलमा निहालजंग थापा र सक्षमबिक्रम शाहको जोडीलाई ७–६, ७–६ को सेटमा पराजित गर्दै उनीहरुको जोडीले उपाधि जितेको हो ।

यता ३५ प्लस डबल्समा देव क्षेत्री र दीपजेबी राणाको जोडीले जितेन्द्र परियार र समिर शाहको जोडीलाई ६–०, ६–३ को सेटमा पराजित गर्दै उपाधि जत्यो ।

४५ प्लस डबल्सको उपाधि भने कमल भण्डारी र सुर्दशन बि को जोडीले जितेको छ। फाइनलमा रोहित सुनुवार र हिमाल शाहको जोडीलाई ६–२, २–६, १०–८ को सेटमा पराजित गर्दै कमल र सुर्दशनको जोडीले उपाधि जितेको हो ।

५५ प्लस डबल्समा चन्द्र शाही र उत्तम केएसको जोडीले हिमाल शाह र सुर्दशन बिको जोडीलाई ६–४, ६–२ को सेटमा पराजित गर्दै उपाधि जितेको छ।

यसैगरि ३५ प्लसमा सिगलमा जितेन्द्र परियार र सन्तोष खत्री उपाधिको शुक्रवार भिड्ने छन् । जितेन्द्रले दीप जेबी राणालाई ६–०, ६–० र सन्तोषले राजन पौडेललाई ६–२, ६–२ को सेटमा पराजित गर्दै फाइनल भेट पक्का गरेका हुन्।

यसैगरि ४५ प्लस सिगलमा भने देव क्षेत्रीले कमल भण्डारीको सामना गर्ने भएका छन् । कमलले माधव भण्डारीलाई ६–२, ६–१ र तथा देवले राज गुरुङलाई ६–२, ६–१ को सेटमा पराजित गर्दै फाइनलमा भेट पक्का गरे।

बुटवल उपमहानगरपालिकाको सहयोगमा रुपन्देही टेनिस संघको आयोजनामा फागुन ९ गतेसम्म हुने प्रतियोगितामा एक सय बढी खेलाडीहरु सहभागी रहेको संघका जिल्ला अध्यक्ष गोपाल ज्ञवालीले बताएका छन् ।