काठमाडौं (हाम्रो खेलकुद) – नेपाल ब्याडमिन्टन संघको आयोजनामा ब्याडमिन्टनको ओलम्पिक सोलिडारिटी कोचिङ कोर्स हुने भएको छ । संघले मंगलबार पत्रकार सम्मेलन गर्दै यसै महिना बिडब्लुएफ लेभल वान र लेभल टु कोचिङ कोर्स हुन लागेको जानकारी गरायो ।

डल्लु आवास क्षेत्रमा रहेको एनओसी अर्थक्वेक मेमोरियल कभर्डहलमा हुने कोचिङ कोर्स अन्तर्गत लेभल टु मा १४ र लेभल वानमा २० कोच सहभागी हुने ब्याडमिन्टन संघका अध्यक्ष रामजीबहादुर श्रेष्ठले जानकारी दिएका छन् ।

लेभल टु कोचिङ कोर्स कात्तिक ९ देखि १४ गते सम्म हुनेछ । त्यस्तै लेभल वान कोर्स कात्तिक १९ देखि २४ गते सञ्चालन हुनेछ ।
चेक रिपब्लिककी मार्केटा, बंगलादेशकी निखिल चान्द्रधार र भुटानका दोर्जीले कोचिङ कोर्स सञ्चालन गर्नेछन् जनाएको छ । । दुवै लेभलमा ३० प्रतिशत महिला प्रशिक्षक अनिवार्य सहभागी हुनेपर्ने संघका अध्यक्ष श्रेष्ठले बताए ।

नेपालमा पहिलो पटक ब्याडमिन्टनको लेभल टु कोचिङ कोर्स हुन लागेको छ । ‘यसअघि लेभल टु कोर्स गर्न मलेसियामा जानुपथ्र्याे । हामीले पहिलो पटक लेभ टु कोचिङ कोर्स पनि नेपालमै गर्न लागेका छौँ । यस कोर्सले नेपाली ब्याडमिन्टन प्रशिक्षकको वृद्धि विकासमा सहयोग पुग्ने अपेक्षा छ ,’ संघका अध्यक्ष श्रेष्ठले भने ।

अन्तर्राष्ट्रिय ओलम्पिक कमिटीले सुरु गरेको ओलम्पिक सोलिडारिटी कोर्सले विकासिल राष्ट्रका खेलाडी र खेलको विकासका लागि सहयोग गर्ने गर्छ । अन्तर्राष्ट्रिय ओलम्पिक कमिटीमार्फत नेपाल ओलम्पिक कमिटी (एनओसी) का लागि ओलम्पिक सोलिडारिटी कोर्स गर्न फण्ड आउने गर्छ ।

त्यसै अन्तर्गत ब्याडिमन्टनको सोलिडारिटी कोर्स हुन लागेको हो । यस कोर्स सञ्चालन गर्न एनओसीले ब्याडमिन्टन संघलाई ८ हजार अमेरिकी डलर प्रदान गर्ने एनओसीका उपाध्यक्ष तथा निर्देशक चतुरानन्द राजवैद्यले जानकारी दिए ।