सुमन अधिकारी, बुटवल

प्रदिप खड्का र रितिक राना बुटवलमा जारी दोस्रो मेयर कप तथा छैटौ राष्ट्रिय खुला लनटेनिस प्रतियोगिताको पुरुषतर्फको उपाधिका भिड्ने भएका छन् ।

रुपन्देही लन टेनिस संघको आयोजनामा देविनगरस्थित लनटेनिस कोर्टमा शुक्रबार भएको पहिलो सेमिफाइनलमा साविक विजेजा प्रदिपले प्रनव मानन्धरलाई ६–१, ३–६ र ६–२ को सेटमा हराए । अर्को सेमिफाइनलमा रितिक निशान्त श्रेष्ठलाई ६–१ र ६–३ को सेटमा पराजित गर्दै अन्तिम दुईमा पुगेका हुन । फाइनल शनिबार हुनेछ ।

मेन्स डबल्सको उपाधि आयुषमान हजुर घले र आशिष खड्काको जोडीले हात पारेको छ । आर्यन गिरी र सक्षम बिक्रम शाहको जोडीलाई ६–४, ६–२ ले हराउँदै हजुर र आशिषले उपाधि जितेका हुन् । ३५ वर्ष प्लस सिंगलको उपाधि अनिल शाहीले जिते । अनिलले फाइनलमा सन्तोष खत्रीलाई ६–४, ६–४ ले पराजित गरे ।

सिमान्त गुरुङ र अनिल शाहीको जोडीले ३५ वर्ष प्लस डबल्सको उपाधि जितेको छ । सिमान्त र अनिलको जोडीले फाइनलमा सन्तोष खत्री र सन्जय प्रकाश श्रेष्ठको जोडीलाई ६–२, ६–३ ले पराजित गर्यो । ४५ वर्ष प्लस सिंगलको उपाधि कमल भण्डारीले जिते । कमलले फाइनलमा सिमान्त गुरुङलाई ६–१, ६–१ ले हराएका हुन् ।

गोपी भट्टराई र धर्मसिह लामिछानेको जोडीले ४५ वर्ष प्लस डबल्समा उपाधि जितेको छ । रोहित सुनवार र जोली टार्जेनको जोडीलाई ७—५, ७—५ ले हराउँदै गोपी र धर्मको जोडीले उपाधि जितेको हो ।

यसैगरि ५५ वर्ष प्लस सिंगलको उपाधि चन्द्र शाहीले जितेका छन् । चन्नद्रले राजु श्रेष्ठलाई ६–२, ६–४ ले हराए । ६५ वर्ष प्लस सिंगलको उपाधि मनोज राणाले जितेका छन् । मनोजले फाइनलमा ध्रव गुरुङलाई ६–१, ६–२ ले हराएका हुन् ।

प्रतियोगितामा ११ विधामा झण्डै एक सय खेलाडीले प्रतिस्पर्धा गरेको संघका अध्यक्ष गोपाल ज्ञवालीले जनाएका छन् । प्रतियोगिताको महिला/पुरुष सिंगलतर्फ उपाधि विजेताले ६० र दोस्रोले ३० हजार तथा तेस्रो हुने दुई जना खेलाडीले जनही २० हजार रुपैयाँ प्राप्त गरे ।