काठमाडौं (हाम्रो खेलकुद)- उमित शाक्य एनएसआरए एनिभरसरी कप स्क्वास प्रतियोगिताको पुरुष एकलमा सेमिफाइनल छन् ।

बुधबार छविलाल पाइजा पुनलाई ११–७, ११–५, ११–५ ले हराउँदै उमित अन्तिम चारमा पुगेका हुन्। योसँगै पुरुष एकलको सेमिफाइनल समिकरण पूरा भएको छ ।

मंगलबार शीर्ष वरीयताप्राप्त खेलाडी अरहन्तकेशर सिंह, अमिर ब्लोन र दिपक थापा सेमिफाइनल पुगेका
थियो । सेमिफाइनलमा उमितले अरहन्त र अमिरले दिपकसँग प्रतिस्पर्धा गर्ने छन्।

यसैगरी महिला एकलमा गत एसियाडमा खेल्ने दुई खेलाडी विपना ब्लोन र स्वस्थानी श्रेष्ठसँगै धकमाया पाइजा पुन विजयी भए ।

विपनाले साक्षी कुँवरलाई ११–३, ११–३, ११–७, स्वस्थानीले अस्मिता नगरकोटीलाई ११–५, ११–८ र ११–८ तथा धकमायाले युनी ताम्राकारलाई ११–७, ११–४ र ११–३ ले पराजित गरिन् ।

ब्वाइज यु१९ मा विकास तुम्सिङ मगरले हेलिस घिसिङलाई ११–१, ११–२, ११–४, रोहन परियारले सञ्जय श्रेष्ठलाई ११–६, ११–३, ११–६ र राकेश परियारले किशोर श्रेष्ठलाई ५ सेटमा ८–११, ११–३, ११–१, ५–११ र ११–४ ले निराश बनाए ।

गल्र्स यु१९ मा रचना प्रजाले दोहारो जित निकालिन् । रचनाले युनीलाई ११–५, ११–६ र आग्या सुनुवारलाई ७–११, १२–१० र ११–६ ले पराजित गरिन् ।

साक्षीले मिलियाना कुँवरलाई ११–१, ११–० र अर्पणा प्रजाले नियुक्ती श्रेष्ठलाई ११–५, ११–१ ले हराइन्।
नेपाल स्क्वास र्याकेट संघ स्थापना ३५ वर्ष पुगेको अवसरमा एनएसआरए एनिभरसरी कप स्क्वास आयोजना गरिएको हो ।

एक्स स्टेपको प्रायोजन रहेको यो प्रतियोगिता मंसिर २९ गतेसम्म चल्ने प्रतियोगितामा पुरुष ओपन, महिला ओपन, ब्वाइज यु१९, गल्र्स यु१९, मास्टर्स ५० प्लस र प्लेट गरि ६ विधामा प्रतिस्पर्धा भइरहेको छ ।