काठमाडौं (हाम्रो खेलकुद) – पाँचौ सम्झना कप मार्फत नेपालमा पहिलो पटक विश्व स्तरीय टेबल टेनिस बोर्ड प्रयोग हुने भएको छ । चाइना ट्रेड लिंकको प्रायोजनमा विश्वकपमा प्रयोग भएको डबल हेपिनेसको विश्वस्तरीय बोर्ड यसपटक प्रयोग हुने भएको हो ।

ललितपुर टेबलटेनिस क्लबको आयोजनामा हुने प्रतियोगितामा डबल हेपिनेसको बोर्डसँगै बल पनि प्रयोग हुनेछ । यसमा लाग्ने सम्पूर्ण खेल सामग्रीको प्रायोजन नेपालका लागि डबल हेपिनेसको अधिकारिक विक्रेता चाइना ट्रेड लिंकले गर्नेछ । यस सामाग्रीको मूल्य नेपाल आइपुग्दा झन्डै १० लाख रुपैयाँ पर्ने आयोजकले जनाएको छ ।

यससँगै चाइना ट्रेड लिंकको लि निङले पनि प्रतियोगिताका विजेता खेलाडीलाई गिफ्ट ह्याम्पर प्रदान गर्नेछ । आइतबार एक कार्यक्रममाझ चाइना ट्रेड लिंक प्रालिका प्रबन्ध निर्देशक राजेन महर्जन र क्लबका अध्यक्ष उर्दीप जोशीले सम्झौता पत्रमा हस्ताक्षर गरे ।

प्रतियोगिताको अनुमानित बजेट २२ लाख ५० हजार रुपैयाँ रहेको छ । यसमा मेटल सेपरले सह प्रायोजनवापत बजेटको ३५ प्रतिशत रकम उपलब्ध गराउनेछ । सेपरका प्रबन्ध निर्देशक निरज जाेशी र क्लब अध्यक्ष उर्दीप जोशीले सम्झौतामा हस्ताक्षर गरे ।

लैनचौर स्थित राष्ट्रिय टेबल टेनिस प्रशिक्षण केन्द्रमा माघ १७ देखि २१ गते सञ्चालन हुनेछ । प्रतियोगिताको मुख्य प्रायोजन सम्झना ल्याबोरेटोरी क्लिनिक प्रा. लि.ले गरेको छ ।

प्रतियोगितामा नेपालसहित भारतबाट ९, बेलायतबाट २ तथा पोर्चुगल र फ्रान्सबाट १-१ सहित अन्य राष्ट्रका २ सय बढी खेलाडीको सहभागिता रहने अनुमान गरिएको छ । प्रतियोगितामा मेन्स टिम, वुमेन्स टिम, मेन्स सिंगल, वुमेन्स सिंगल, मेन्स भेट्रान सिंगल्स (४० वर्षमाथि), वुमेन्स भेट्रान सिंगल्स (४० वर्षमाथि) र मेन्स भेट्रान्स सिंगल्स (५५ वर्षमाथि ) गरि ७ इभेन्टमा प्रतिस्पर्धा हुनेछ ।

नेपाली टेबल टेनिस खेलको इतिहासमा अहिलेसम्मकै ठूलो धन राशी ५ लाख रुपैयाँ पुरस्कार रहेको प्रतियोगितामा मेन्स / वुमेन्स टिम स्पधको विजेता टोलीले ५० हजार, दोस्रो हुनेले २५ हजार र सेमिफाइनल पुग्ने दुई टोलीले १० हजार रुपैयाँ प्राप्त गर्नेछन् ।

त्यस्तै वुमेन्स/ मेन्सतर्फको विजेताले ५० हजार, दोस्रो हुनेले २५ हजार र सेमिफाइनल पुग्नेले १० हजार रुपैयाँ प्राप्त गर्नेछन् । भेट्रान्स सिंगल्स तर्फको विजेताले २० हजार, दोस्रोले १० हजार रुपैयाँ प्राप्त गर्नेछन् ।