काठमाडौं (हाम्रो खेलकुद)– ललितपुर टेबल टेनिस क्लबको आयोजनामा अर्को महिना पाँचौं सम्झना कप अन्तर्राष्ट्रिय टेबल टेनिस प्रतियोगिता हुने भएको छ ।

अखिल नेपाल टेबल टेनिस संघको तत्वावधानको वार्षिक कार्यक्रम अनुसार हुने प्रतियोगिता लैनचौर स्थित राष्ट्रिय टेबल टेनिस प्रशिक्षण केन्द्रमा माघ १७ देखि २१ गते सञ्चालन हुने बिहीबार आयोजित पत्रकार सम्मेलनमा जानकारी गराइएको छ ।

प्रतियोगिताको मुख्य प्रायोजन सम्झना ल्याबोरेटोरी क्लिनिक प्रा. लि.ले गरेको छ । सम्झानाकातर्फबाट रजना जोशी र आयोजक ललितपुर टेबल टेनिस क्लबका अध्यक्ष उर्दीप जोशीले सम्झौता पत्रमा हस्ताक्षर गरेका थिए । प्रतियोगितामा नेपासहित भारत, पाकिस्तान, बंगलादेश, मालदिभ्स, थाइल्यान्ड, युएई, जापान, फ्रान्स, इङ्गल्याण्ड, कोरियासहित अन्य राष्ट्रका ५ सय बढी खेलाडीको सहभागिता रहने अनुमान गरिएको छ ।

प्रतियोगितामा मेन्स टिम, वुमेन्स टिम, मेन्स सिंगल, वुमेन्स सिंगल, मेन्स भेट्रान सिंगल्स (४० वर्षमाथि), वुमेन्स भेट्रान सिंगल्स (४० वर्षमाथि) र मेन्स भेट्रान्स सिंगल्स (५५ वर्षमाथि ) गरि ७ इभेन्टमा प्रतिस्पर्धा हुनेछ । नेपाली टेबल टेनिस खेलको इतिहासमा अहिले सम्मकै ठूलो धन राशी ५ लाख रुपैयाँ पुरस्का रहेको प्रतियोगिता सञ्चालनका लागि २२ लाख ५५ हजार रुपैयाँ खर्च हुने अनुमान आयोजक रहेको छ ।

मेन्स / वुमेन्स टिम स्पधको विजेता टोलीले ५० हजार, दोस्रो हुनेले २५ हजार र सेमिफाइनल पुग्ने दुई टोलीले १० हजार रुपैयाँ प्राप्त गर्नेछन् । त्यस्तै वुमेन्स/ मेन्सतर्फको विजेताले ५० हजार, दोस्रो हुनेले २५ हजार र सेमिफाइनल पुग्नेले १० हजार रुपैयाँ प्राप्त गर्नेछन् । भेट्रान्स सिंगल्स तर्फको विजेताले २० हजार, दोस्रोले १० हजार रुपैयाँ प्राप्त गर्नेछन् ।