काठमाडौं (हाम्रो खेलकुद) – काठमाडौं ब्याडमिन्टन एकेडेमीले गुरु पूर्णिमाको अवसरमा बुधबार ब्याडमिन्टनकर्मीहरुलाई सम्मान गरेको छ ।

एकेडेमीले खेलाडी उत्पादनमा आफ्नो समयमा महत्वपूर्ण भूमिका निर्वाह गरेका प्रणवकुमार तालुकदर, उत्तम सिंखडा, प्रकाश उदय, धर्मलाल श्रेष्ठ, रजनी जोशी, उदयकुमार श्रेष्ठ, महेन्द्रलाल श्रेष्ठ, शान्ति मानन्धरलाई सम्मान गरेको छ । सोही अवसरमा ब्याडमिन्ट विकासमा महत्वपूर्ण योगदान गरेका स्वर्गिय ज्ञानबहादुर खड्का, दिलेन्द्रवीर पाण्डे र पुरुषोत्तम केसीलाई स्मरण गरिएको थियो ।

अफिसियल रुपमै प्रशिक्षक नभएपनि आफैले र्याकेट समात्न लगाएर खेल सिकाउँदै नेपाली ब्याडमिन्टनको यात्रामा महत्वपूर्ण भूमिका निर्वाह गरेका त्रिरत्न मानन्धरलाई विशेष सम्मान गरिएको थियो । खेलकुद पत्रकार कुशल तिमल्सिनालाई पनि सोही अवसरमा १५ हजार रुपैयाँ सहित सम्मान गरिएको थियो ।

राष्ट्रिय खेलकुद परिषद् (राखेप) का सदस्य सचिव टंकलाल घिसिङ, नेपाल ब्याडमिन्टन संघका अध्यक्ष रामजीबहादुर श्रेष्ठ, नेपाल ओलम्पिक कमिटी (एनओसी) का महासचिव निलेन्द्रराज श्रेष्ठ, नेपाल राष्ट्रिय तथा अन्तर्राष्ट्रिय खेलाडी संघका अध्यक्ष दीपक श्रेष्ठलगायतले सम्मान गरेका थिए ।

केबिएलाई प्रेसिडेन्सियल बिजनेस स्कुल प्रायोजन
खेलाडी उत्पादन मुख्य उद्देश्य राखेको काठमाडौं ब्याडमिन्टन एकेडेमीलाई प्रेसिडेन्सियल विजनेस स्कुलले मुख्य प्रायोजन गरेको छ । अब एकेडेमीको नाम केबिए प्रेसिडेन्सियल काठमाडौँ ब्याडमिन्टन एकेडेमी रहने बताइएको छ । बार्षिक १५ लाख रुपैयाँ बराबरको प्रायोजन सम्झौता भएको छ । सम्झौता दुई वर्ष रहेको बताइएको छ । प्रेसिडेन्सियल विजनेस स्कुलले केबीएलाई बार्षिक ५ लाख नगद र केबीएका खेलाडीलाई प्रेसिडेन्सियल कलेजमा १० लाख बराबरको व्याचलर र मास्टर्स लेबलका कोर्स अध्ययन गर्ने सुविधा दिने बताइएको छ।

केबिएको यात्रा
ब्याडमिन्टनमा उत्कृष्ट खेलाडीहरू उत्पादन गर्ने उद्देष्यसहित एकेडेमीको स्थापना २०७७ साल पुसमा भएको थियो । गैर नाफामूलक संस्थाको रुपमा स्थापित एकेडेमीले छोटो अवधिमै अन्तर स्कूल प्रतियोगितामा च्याम्पियन खेलाडी निकालेको थियो ।
राखेपमा ब्याडमिन्टनका मुख्य प्रशिक्षक भइसकेका उदय कुमार श्रेष्ठलाई प्रमुख प्लेयर्स डेभलप्मेन्ट डिपार्टमेन्टको जिम्मेवारी दिएको एकेडेमीमा विश्व ब्याडमिन्टन महासंघका प्रमाणपत्र प्राप्त प्रशिक्षक बालकृष्ण थापा र पुरुषोत्तम ढकालले खेलाडीलाई प्रशिक्षण दिइरहेका छन् । केबीएको प्रशिक्षण अचेल देवीनगर क्लब, बानेश्वरमा नियमित भइरहेको एकेडेमीले जनाएको छ ।
ब्याडमिन्टन प्रवर्धन गर्ने उद्देश्य अनुरुप एकेडेमीले गत वर्ष कुमारी बैंक काठमाडौ टिम च्याम्पियनसिप २०२१ कर्पोरेट व्याडमिन्टन ९आमन्त्रण० आयोजना गरेको थियो ।