एजेन्सी – दोस्रो वरीयताका स्पेनिस टेनिस स्टार राफयल नाडालले विम्बल्डन टेनिसको सेमिफाइनलबाट आफ्नो नाम फिर्ता लिएका छन् । पेटको चोटको कारण उनले आफ्नो नाम फिर्ता लिएका हुन् ।

बिहीबारको परिक्षणपछि उनको पेटको मांसपेशीको एक भाग ७ एमएम च्यातिएको बताइएको छ । विम्बल्डनको सुरुवातदेखि नै पेटको समस्यासँग जुधेका नाडालले क्वाटरफाइनलमा टेलर फ्रिट्जसँगको खेलपछि झन बढी दुखाईको महसुस भएको बताएको थियो ।

कोर्टमा जानुअघि नै नाडालले चोटकै कारण प्रतियोगिताबाट नाम फिर्ता लिनु परेको यो छैटौं पटक हो । कीर्तिमानी २२ पटकको ग्रान्डस्लाम विजेता नाडाल दुई पटकको ग्रान्डस्लाम च्याम्पियन हुन् । नोभाका जोकोभिच र रोजर फेडेररले समान २० पटक ग्रान्डस्लाम जितेका छन् ।

‘दुर्भाग्यवश म यहाँ छु, किनभने मैले प्रतियोगिताबाट बाहिरिनु परेको छ ।’ ३६ वर्षीय नाडालले भने, ‘मैले दिनभरिमा निर्णय गर्नेबारे सोचेका थिए । तर, मलाई लाग्छ म कोर्टका जानुको कुनै अर्थ छैन । मैले खेलेको अवस्थामा चोट झनै बल्झिन सक्छ, यो अवस्थामा म प्रतिस्पर्धी हुनेछैन ।’

नाडालले सेमिफाइनलमा अष्ट्रिय निक किर्गियोससँग खेल्ने तय थियो । अब नाडालले आफ्नो नाम फिर्ता लिएसँगै किर्गियोस फाइनलमा प्रवेश गरेका छन् । अब किर्गियोसले शीर्ष वरीयताका सर्वियन जोकोभिच र बेलायती क्यामरुन नोरीबीचको विजेतासँग फाइनलमा खेल्नेछ ।

सेन्टर कोर्टमा बुधबार राति भएको क्वाटरफाइनलमा ४ घन्टा २१ मिनेट चलेको खेलबाट नाडालले अमेरिकी टेनिस स्टार टेलर फ्रिट्जमाथि ३–६, ७–५, ३–६, ७–५ र ७–६ (१०–४) को सेटमा जित निकाल्दै अन्तिम चारको यात्रा तय गर्न सफल भएका थिए ।