इशा र श्रवनीको जोडी सेमिफाइनलमा

विजय नेपाली, पोखरा

नेपाली खेलाडी इशाश्री शाह र श्रवनी श्रेष्ठको जोडी पोखरा रंगशालामा जारी आइटिएफ वल्र्ड टेनिस टुर जुनियर ५ अन्तर्गत महिला युगलको सेमिफाइनलमा पुगेको छ । बुधबार इशाश्री र श्रवनी जोडीले भारतकी श्रीतन्वी दसारी र भिन्सिका मारीको जोडीलाई ६–२ र ६–२ सेटमा हराउँदै अन्तिम चारमा पुगेको हो ।

त्यस्तै सोही इभेन्टमा अभिलागा विष्ट र सलोनी तामाङको जोडी क्वाटरफाइनलमा पुगेको छ । अभिलागा र सलोनीको जोडीले भारतकी सुकमनी भण्डारी र हाना नागकी जोडीलाई ७–५ र ६–४ ले हरायो ।

बुधबार समग्रमा २१ खेल सम्पन्न भएका छन् । पुरुष व्यक्तिगत तर्फ ८ खेल र महिला व्यक्तिगत तर्फका ८ खेल सम्पन्न भएका छन् । महिला तर्फका ४ तथा पुरुष तर्फ १ खेल सम्पन्न भए । पुरुष तर्फको उक्त खेलमा नेपालका आर्यन गिरी र आरभ सम्राट हाडाको जोडीले भारतका हितेश चौहान र चन्दन शिवरलाई ७–६ र ६–१ को सेटमा हराए ।

व्यक्तिगत तर्फभने नेपालकी सलोनी तामाङले मात्रै जित हात पारिन् । उनले पुनरागमन जित निकालिन । पहिलो सेटमा ६–३ को सेटमा हारेकी सलोनीले दोस्रो र तेस्रो सेटमा भने उत्कृष्ट प्रदर्सनी गर्दै जित हात पारिन् । उनले भारतकी सोहिनी संजय मोहन्तलाई ३–६, ६–४ र ७–५ को सेटमा हराउँदै जित हात पारिन् ।