बाल्टिमोर (हाम्रो खेलकुद) – अमेरिकाको बाल्टिमोर हुने साथी कप २०२२ का लागि साथी बाल्टिमोर क्रिकेट क्लबले नयाँ जर्सी सार्वजनिक गरेको छ ।

आइतबार क्लोभरल्यान्ड क्रिकेट मैदानमा फार वेस्टर्न क्रिकेट क्लबसँग मैत्रीपूर्ण खेल आयोजना गर्दै क्लबले जर्सी सार्वजनिक गरेको हो । खेलअघि जर्सी सार्वजनिक कार्यक्रममा बाल्टिमोर काउन्टी डिस्ट्रिक्ट ५ को काउन्सिलम्यान डेविड मार्क्स र स्टेट डेलिगेट डिस्ट्रिक्ट ८ कार्ल ज्याकसन उपस्थित रहेका थिए । उद्घाटन सत्रमा डेविडले बलिङ र कार्लले ब्याटिङ गरेका थिए ।

मैत्रीपूर्ण खेलमा भने फार वेस्टर्नले जित हासिल गरेको थियो । बाल्टिमोरले प्रस्तुत गरेको लक्ष्य फार वेस्टले ९ विकेटको क्षतिमा पूरा गरेको हो । साथी बाल्टिमोरकै अग्रसरतामा क्लोभरल्यान्ड मैदानमा क्रिकेट खेलिंदै आएको छ । निकट भविष्यमा मैदानको स्तरोन्नति गर्ने लक्ष्य क्लबले राखेको छ ।

साथी बाल्टिमोर क्रिकेट क्लबले नयाँ सिजनका लागि २०२२-२३ सिजनका लागि जर्सी सार्वजनिक गरेको हो । जर्सी सार्वजनिकमा मुख्य प्रायोजक घिमिरे होम्सका सिइओ क्रिस घिमिरेको पनि उपस्थिति रहेको थियो । कार्यक्रममा एनआरएन मेरील्यान्ड च्यापटर अध्यक्ष राजु पराजुली, पूर्व राष्ट्रिय खेलाडी तथा तेक्वान्दो रेफ्री राजु क्षेत्री, नेपाल अल स्टार्सका आशिक लामा र फार वेस्टर्न समाजका अध्यक्ष दमन विक्रम शाही पनि उपस्थित थिए ।