दुई तेक्वान्दो संघलाई मिल्न राखेपको एक हप्ते अल्टिमेटम

काठमाडौं (हाम्रो खेलकुद) – नेपाली खेलकुदको सर्वाेच्च निकाय राष्ट्रिय खेलकुद परिषद (राखेप) ले समान हैसियत र अस्थित्वमा रहेका दुई तेक्वान्दो संघलाई मिलेर जान सात दिने अल्टिमेटम दिएको छ ।

सदस्य सचिव केशवकुमार विष्टले मंगलबार दुवै संघलाई पत्र पठाएर विवाद समाधानको लागि सात दिने अल्टिमेटम दिएको हो । राखेपले दुवै संघलाई लेखेको पत्रमा दुवै संघ मिल्न नसकेको अवस्थामा माघमा आयोजना हुन लागेको आठौं राष्ट्रिय खेलकुदको जिल्ला, प्रदेश र केन्द्रीय छनोट प्रभावित हुने उल्लेख गरेको छ । आठौं राष्ट्रिय खेलकुद आगामी माघ २२ देखि आयोजना हुने तय भएको छ ।

राखेपको ११०औं बोर्ड बैठकले दुई तेक्वान्दो संघलाई आपसी छलफल गरी विवाद समाधान गराउने भएको निर्णय भएको उक्त निर्णय कार्यान्वयन गर्न पत्राचार गरिएको उल्लेख छ । विश्व तेक्वान्दो महासंघले सम्बन्धन दिएको प्रकाश शम्सेर राणा नेतृत्वको नेपाल तेक्वान्दो संघ र नेपाल तेक्वान्दो युनियन अस्तित्वमा छ ।