मस्को (एजेन्सी)– साविक विजेता जर्मनी पहिलो खेलमा पराजित भएपनि समूह ‘एफ’ रोचक बन्ने अपेक्षा गरिएको छ । समूह को पहिलो खेलमा अपेक्षा विपरित मेक्सिकोले जर्मनीलाई १–० ले हराएको थियो । त्यहि समूहमा सोमबार दक्षिण कोरिया र स्वीडेनबीच प्रतिस्पर्धा हुँदैछ । खेल नेपाली समय अनुसार साँझ ५ः४५ मा सुरु हुनेछ ।

जर्मनीको हारपछि स्वीडेन र दक्षिण कोरिया दुवै टोलीले एकअर्कासँग सचेतापूर्वक लिनेछन् । पहिलो खेलको हार नकआउट चरण पुग्ने सम्भावना कमजोर हुने भएकाले दुवैले आजको खेल गुमाएर आफ्नो टोलीमाथि थप संकट निम्त्याउन चाहनेछैनन् । स्वीडेन १२ वर्षपछि विश्वकपमा फर्केका छ ।

यद्दपी टोलीका पूर्व कप्तान एवंम् अनुभव स्ट्राइकर ज्लाटान इब्राहिमोभिच हुने छैनन् । प्ले अफमा इटालीलाई हराउँदै स्वीडेनले यसपटकको विश्वको यात्रा तय गरेको थियो । दक्षिण कोरिया चार वर्षअघि भन्दा राम्रो प्रदर्शनको अपेक्षामा रहेको छ ।

जति बेला टोली समूह चरणमा सान्त्वना अंक लिएर पहिलो चरणबाटै बाहिरिएको थियो । सन् १९५८ मा घरेलु भूमिमा आयोजना भएको विश्वकपमा उपविजेता बन्नु स्वीडेनको अहिले विश्व कपको उच्च प्रदर्शन हो ।

त्यस्तै २००२ मा जापानसँग संयुक्त रुपमा आयोजना गरेको विश्व कपको सेमिफाइनल पुग्ने कोरियाको अहिले सम्मको उच्च प्रदर्शन हो । २०१० को विश्व कपमा टोली अन्तिम १६ सम्म पुगेपनि ब्राजिल विश्वकपमा भने टोली निराश बनेर फर्केको थियो । कोरियामा टोटनह्यामका फरवार्ड सन ह्योङ–मिनको उपस्थितीले टोलीको मनोबल उच्च छ । टोलीको यो लगातार नवौं विश्व कप सहभागिता हो ।

पहिलो खेलमा जर्मनी मेक्सिकोसँग १–० ले पराजित भएपछि अब बाँकी खेल थप प्रतिस्पर्धात्मक र कठिन हुने अपेक्षा गरिएको छ । स्वीडेन र दक्षिण कोरियाबीचको विजेताले अघिल्लो चरणको सम्भावनालाई बलियो बनाउने भएकाले दुवै टोलीले जितका लागि निश्चित प्रयास गर्नेछन् ।