रियो (एजेन्सी) – ब्राजिलका सुपरस्टार फरवार्ड नेयमार विश्वकपको पहिलो खेलदेखि पुरै फिटनेसमा फर्कने सुरमा छन् । यसैक्रममा आफ्नो फिटनेसको अवस्था बुझ्न नेयमारले मंगलबार विभिन्न परिक्षणहरु लिएका छन् ।

फ्रान्सेली लिगमा पेरिस सेन्ट जर्मेनको लागि खेल्ने क्रममा खुट्टामा चोट बोकेका नेयमारले सिजनको दोस्रो भागमा सहभागिता जनाएनन् । २६ वर्षीय नेयमार क्लब फुटबलमा चोटपछि नखेलेपनि ब्राजिलका प्रशिक्षक टिटेले उनलाई टोलीमा समेटेका छन् । उनले विश्वकप अघिका मैत्रीपूर्ण खेलमा केहि समय खेलेर विश्वकपको पहिलो खेलसम्म पूर्ण रुपमा फिट हुने अभिव्यक्ति दिएका थिए ।

नेयमारले फेब्रुअरी महिनामा मार्सेविरुद्ध घरेली मैदानमा भएको खेलमा चोट बोकेका थिए । उनको टोलीले ३-० को अग्रता लिएको अवस्थामा विपक्षी टोलीका बौना सारको ट्याकलका कारण नेयमार घाइते भएका थिए । ट्याकल लागेकै बेलामा मैदानमा लडेका नेयमारले त्यसयता कुनै खेल खेलेका छैनन् ।

नेयमारको खुट्टाको हड्डी भाँचिएको र कुर्कुच्चा पनि मर्किएको थियो । उनले चोट बोकेलगत्तै विश्राम लिएर उपचार सुरु गरेका थिए । त्यसका लागि केहि समय नेयमार ब्राजिल पनि फर्केका थिए ।  फिटनेस परिक्षणका दौरान नेयमारले सुखद पुनरागमन गर्ने लक्षण देखाएको बुझिएको छ ।

परिक्षण गर्ने समयमा नेयमारले विभिन्न ड्रिलहरु गरेका थिए । कुनै सहयोगबिना परिक्षण गरेका नेयमारले दुवै खुट्टाको बलमा उफ्रिएका छन् । उनले दुवै खुट्टा प्रयोग गरेर बल प्रहार पनि गर्न थालेका छन् । ब्राजिलले विश्वकप अघि हुने मैत्रीपूर्ण खेलमा क्रोएसिया र अस्ट्रियाको सामना गर्नेछ । विश्वकपमा ब्राजिलको समूहमा सर्बिया, कोस्टारिका र स्विटजरल्यान्ड छन् ।