काठमाडौं (हाम्रो खेलकुद) – त्रिपुरेश्वोर स्थित राष्ट्रिय खेलकुद परिषद्को कभर्डहलमा आजबाट  चौथो केएनपी राष्ट्रिय महिला भलिबल प्रतियोगिता सुरु हुँदैछ। 

शेरबहादुर खड्का स्मृति प्रतिष्ठानले आयोजना गरेको प्रतियोगितामा तीन विभागीय टोलीसहित न्यु डायमण्ड एकेडेमी, पश्चिमाञ्चल भलिबल टोली र जावलाखेल भलिबल प्रशिक्षण केन्द्रको सहभागिता रहेको छ।

आज नेपाल पुलिस क्लब र शिवम् न्यु डायमण्डबीच प्रतिस्पर्धा हुनेछ। न्यु डायमण्ड अघिल्लो संस्करणको उपविजेता हो। प्रतिस्पर्धात्मक फाइनलमा न्यु डायमण्ड एपिएफसँग ३-२ ले पराजित भएको थियो। त्यस्तै नेपाल पुलिस क्लब भने तेस्रो स्थानको खेलमा पश्चिमाञ्चलसँग पराजित भएको थियो।

प्रतियोगितामा उत्कृष्ट प्रदर्शन गर्ने खेलाडीलाई ‘केएनपी सर्वोकृष्ट खेलाडी’ को उपाधि सहित १० हजार रुपैयाँ प्रदान गरिनेछ । विधागत उत्कृष्टतर्फ ‘शिवम् सिमेन्ट वेष्ट स्पाईकर’, ‘शिवम् सिमेन्ट वेष्ट डिफेन्स’ र ‘शिवम् सिमेन्ट वेष्ट ब्लकर’ को उपाधिबाट एक–एक खेलाडीलाई ५ हजार रुपैयाँसहित पुरस्कृत गरिनेछ ।

प्रतियोगिताको विजेताले १ लाख ५० हजार, उपविजेताले १ लाख र तेस्रो हुने टोलीले ५० हजार पुरस्कार पाउनेछन्। त्यस्तै उत्कृष्ट खेलाडीले १० हजार र विधागततर्फ उत्कृष्ट ७ जनाले जनही ५ हजार पुरस्कार पाउनेछन्। प्रतियोगिताको वजेट १८ लाख रहेको छ।

चौथो केएनपी राष्ट्रिय महिला भलिबल प्रतियोगिताको उद्घाटन

मितिः–२०७५ बैशाख २१ गते,शुक्रबार ।
समयः– अपरान्ह १२ः३० बजे ।
स्थानः– राष्ट्रिय खेलकुद परिषद्को कभर्डहल,त्रिपुरेश्वर ।