काठमाडौं (हाम्रो खलकुद) – बंगबन्धु एसियाली सेन्ट्रल जोन भलिबल च्याम्पियनसिपमा नेपालले तीन खेलमा दुई खेल जित्दै फाइनल पुग्ने सम्भावनालाई जीवित राखेको छ । दोस्रो खेलमा आयोजक बंगलादेशसँग हारेको नेपालले पहिलो खेलमा माल्दिभ्स र तेस्रो खेलमा अफगानिस्तानलाई हराएको थियो । नेपालले जितेका दुवै खेल त्रिभुवन आर्मी क्लबका मानबहादुर श्रेष्ठका लागि भने विशेष रह्यो । ओपन स्पाइक उनी दुवै खेलमा म्यान अफ दी म्याच रहे ।

उनको प्रदर्शनका बारेमा मुख्य प्रशिक्षक जगदिश भट्टले भने,‘ मेहनती खेलाडी हुन् । उनको प्रदर्शन उच्च छ । तर उनले पहिलो खेलमा अझै राम्रो खेलेका थिए ।’ गत बर्ष सेमिफाइनलमा यहि प्रतियोगितामा अफगानिस्तानसँग हारेको नेपालले यसपटक विजय लयमा पुनरागमन मात्र गरेको छैन बदला पनि लिएको छ । शनिबार साँझ नेपालले अफगानिस्तानलाई ३–२ ले हराएको छ । नेपाल २५–२१,१८–२५,२५–१४,१९–२५,१५–१३ ले विजयी भएको थियो । यो जितसँगै नेपालले फाइनल पुग्ने सम्भावनालाई जीवित राखेको छ । नेपाले सोमबार कीर्गिस्तानसँग प्रतिस्पर्धा गर्नेछ ।

तर, नेपालका लागि शनिबारको जित महंगो परेको छ । टोलीका अलराउन्ड नरेन्द्र गिरीलाई चोट लागेको छ । विपक्षी खेलाडीले खुट्टामा कुल्चदा उनी घाइते भएका थिए । उनको चोट कति गम्भिर भन्ने एक्सरे पछि मात्र थाहा हुनेछ । उनको अवस्थाका बारेमा भट्टले भने, ‘चोट कति गहिरो भन्ने पछि थाहा हुन्छ । उनलाई चोट लागेपछि हाम्रो लय विग्रियो जसका कारण दोस्रो सेट गुमाउनु पर्यो । ’

अफगानिस्तानलाई हराउन सकेकोमा प्रशिक्षक भट्ट दंग छन् । उनले थपे, ‘अफगानिस्तान बलियो टोली हो, त्यस्तो टोलीलाई हराउन सक्दा खेलाडी थप उत्साहित भएका छन् ।’ च्याम्पियनसिपमा नेपालसहित कीर्गिस्तान, बंगलादेशको समान ६ अंक छ । माल्दिभ्स र अफगानिस्तान अंक विहिन छन् ।
पहिलो खेलमा माल्दिभ्सलाई ३–१ ले हराएको नेपाल शुक्रबार आयोजक बंगलादेशसँगको खेल ३–० ले गुमाएको थियो । माल्दिभ्सलाई २६–२४,१५–२५,२५–१९ र २६–२४ ले हराएको नेपालले बंगलादेशको खेल २५–२१,२५–२० र २५–२३ ले गुमाएको थियो । अफगानिस्तानले लगातार तीन खेल गुमाइसकेको छ ।
लिग कम नकआउटपछि समूहका शीर्ष दुई टोलीले फाइनलमा प्रतिस्पर्धा गर्ने छन् । तेस्रो र चौथो टोलीबीच कास्य पदकका लागि प्रतिस्पर्धा गर्नेछन् । इम रानाको कप्तानीमा रहेको नेपालीमा हरिहजुर थापा, मानबहादुर श्रेष्ठ, धनबहादुर भट्ट, विजय थापा,कुलबहादुर थापा, महेन्द्र श्रेष्ठ, भैरवबहादुर बम,भुवन कार्की, नरेन्द्र गिरी, देव शर्मा र इश्वर थापा छन् ।