गैरीवारीलाई कैलाश कप फुटबल उपाधि

भरतपुर (हाम्रो खेलकुद) – कालिका ८ गैरीवारीले कैलाश कप सेभेन ए साइड फुटबल प्रतियोगिताको उपाधि जितेको छ । ब्रदर्स फुटसल एरेना क्षेत्रपुरलाई टाइब्रेकरमा २–१ ले पराजित गर्दै गैरीवारीले उपाधि जितेको हो ।

त्यसअघि निर्धारित समयको खेल १–१ को बराबरीमा सकिएको थियो । पहिलो हाफको चौथो मिनेटमा नै गैरीवारीले अग्रता लिएको थियो । गैरीवारीका मनिष तामाङले फ्रिकिकमा गोल गर्दै अग्रता दिलाएका थिए ।

एक गोलले पछि परेको क्षेत्रपुरले दोस्रो हाफमा आक्रमक खेल प्रस्तुत गरेको थियो । खेल सकिन ३ मिनेट बाँकी रहदा क्षेत्रपुरले बराबरी गोल फर्कायो । क्षेत्रपुरका प्रविण लिम्बुले गोल गरे । गैरीवारीका मनिष खेलको म्यान अफ दि म्याच घोषित भए ।

गैरीवारीले उपाधिसहित ४२ हजार र क्षेत्रपुरले २२ हजार रुपैयाँ प्राप्त गर्यो । कैलाश युथ क्लब भरतपुर ११ ले आयोजना गरेको प्रतियोगितामा ३२ टोलीको सहभागिता छ ।