काठमाडौं (हाम्रो खेलकुद)– समयमा दुबईको भिसा नपाएपछि दुई नेपाली गल्फरले बुधबारदेखि सुरु हुने एसियन प्यासिफक एमेच्योर गल्फ च्याम्पियनसिपमा भाग लिन नपाउने भएका छन् ।

१३ औं दक्षिण एसियाली खेलकुद (साग) का दोहोरो स्वर्ण पदक विजेता सुवास तामाङ र युवराज भुजेल आइतबार दुबईतर्फ जाने हवाई टिकट थियो । तर त्यो समय सम्म उनीहरुले भिसा पाएनन् । पछि भिसा प्राप्त भएपछि नेपाल गल्फ संघले दुबई जानका लागि अर्को टिकट मिलाएको थियो । तर एसिया प्यासिफिक गल्फ संघले निर्धारित समयमा खेलाडी पुग्न नसकेका कारण प्रतियोगितामा सहभागी गराउन नसक्ने जवाफ दिएको संघले जनाएको छ ।

कोरोनाका कारण तोकिएको मापदण्डका कारण अब नेपाली खेलाडीलाई सहभागी गराउन नसकिने एसिया प्यासिफिकले जनाएको बताइउको छ । गल्फ संघका अध्यक्ष आयोजकले नै खेलाडीको भिसा, टिकटलगायतका व्यवस्थापनको जिम्मा लिएपनि समयमा हुन नसकेकोमा दुःख लागेको बताएका छन् ।
एसिया प्यासिफिक गल्फको निमन्त्रणामा सुवास र युवराज त्यसतर्फ जाने भएपछि संघले शनिबार नै विदाई गरेको थियो । कात्तिक १५ र १६ मा अभ्यास गरेपछि उनीहरुले कात्तिक १७ गते प्रतियोगितामा लिने कार्यक्रम तय थियो । सन् २०१० देखि नै नेपाली खेलाडीले एसिया प्यासिफिक च्याम्पियनसिपमा भाग लिदै आइरहेका छन् ।

गत वर्ष भने कोभिडका कारण च्याम्पियनसिप हुन नसकेको बताइएको छ । यसपटक भने अन्तिम समयमा सुवास र युवराजले अवसर गुमाएका छन् । सुवास एमेच्योरतर्फको विश्व वरियतामा ३ सय एकौं स्थानमा छन् । युवराज भने ३ हजार ८ सय ५८ औं स्थानमा रहेका छन् ।