भरतपुर – कैलाश कप सेभेन ए साइड फुटबलमा शुक्रबार एफएफसी दासढुंगा, आरआरएफसी हेटौंडा र नवदुर्गा एफसी कावासोती विजयी भएका छन् । अर्को खेलमा आयाम युवा क्लबले वाकओभर पाएको छ ।

भरतपुर ११ स्थित कैलाश क्लबको मैदानमा भएको पहिलो खेलमा एफएफसी दासढुंगाले गडुवा एफसीलाई टाईब्रेकरमा २–० ले पराजित गर्यो । निर्धारित समयमा १–१ गोल भएपछि टाईब्रेकरमा दासढुंगाले बाजी मारेको हो । खेलको तेस्रो मिनेटमा सुजन गुरुङले गोल गर्दै दासढुंगालाई अग्रता दिलाएका थिए । तर दोस्रो हाफको १२ औं मिनेटमा गडुवाका मनिष तामाङले बराबरी गोल गरे ।

दोस्रो खेलमा आयाम युवा क्लबले वाक ओभर पाएको छ । रड्स रामपुर उपस्थित नभएपछि आयाम वाक ओभर पाउँदै सिधै प्री क्वाटरफाइनलमा स्थान बनाएको छ । तेस्रो खेलमा आरआरएफसी हेटौंडाले पञ्चकन्या युथ क्लबलाई २–० ले पराजित गरेको छ । हेटौंडाको जितमा एरिस लामा र अशिम गुरुङले गोल गरे ।

चौथो तथा अन्तिम खेलमा नवदुर्गा एफसी कावासोतीले लगनशिल युथ गर्दासमाथि ४–१ को सानदार जित निकालेको छ । कावासोतीलाई जिताउन नवीन गाहा मगर र शिरिश दाहालले समान २–२ गोल गरे । गर्दासका सफल भण्डारीले एक गोल फर्काए ।

प्रतियोगितामा शनिबार पनि चार खेल हुनेछ । शनिबार युनिक एफसी र कालिका गौरीवारी, आयोजक कैलाश युथ क्लब र जिरोना फुटबल क्लब, अकलादेवी एफसी दासढुंगा र खेतबारी एफसी तथा युनिक एफसी (बी) र साहारा क्लबबीच प्रतिस्पर्धा हुनेछ ।

३२ टोलीको सहभागिता रहेको प्रतियोगिताको फाइनल कात्तिक १७ गते हुनेछ । प्रतियोगिताको विजेताले उपाधिसहित ४२ र दोस्रो हुने टोलीले २२ हजार रुपैयाँ प्राप्त गर्ने प्रतियोगिता संयोजक सविन अधिकारीले जानकारी दिए ।