भरतपुर (हाम्रो खेलकुद) – कैलाश कप सेभेन ए साइड फुटबल प्रतियोगिता उद्घाटन खेलमा बिहीबार सर्वश्रेष्ठ नारायण्मी एफसी विजयी भएको छ । नारायणीले वनदेवी क्लबलाई २–१ ले पराजित ग¥यो । नारायणीको जितमा अजय गुरुङ र सागर लामाले गोल गरे । वनदेवीका अमर महतोले एक गोल फर्काए ।

बिहीबारका अन्य खेलमा दमौली एफसी, चन्डिभन्ज्याङ एफसी र दासढुंगा एफसी विजयी भएका छन् । बिहीबार विजेता सबै टोली क्वार्टरफाइनल पुगेका छन् । दोस्रो खेलमा दमौली एफसीले राइजिङ स्टार देवघाटलाई टाई ब्रेकरमा पराजित ग¥यो । निर्धारित समय गोलरहित बराबरीमा सकिएपछि खेलको निर्णय टाई ब्रेकरमा भएको थियो । टाई ब्रेकरमा देवघाट २–१ ले बिजयी भयो ।

तेस्रो खेलमा चन्डिभन्ज्याङले आँपटारी एफसीलाई १–० ले पाखा लगायो । चन्डिभन्ज्याङको जितमा प्रवेश लामाको गोल निर्णायक बन्यो । चौथो तथा अन्तिम खेलमा दासढुङ्गा एफसीले भालुमारा एफसीलाई २–० ले पराजित ग¥यो । दासढुङ्गालाई जिताउन लक्ष्मण गुरुङ र डम्बर गुरुङले गोल गरे ।

प्रतियोगितामा शुक्रबार पनि ४ खेल हुनेछ । पहिलो खेलमा गडुवा एफसी र एफएफसी दासढुङ्गा,दोस्रो खेल रड्स रामपुर र आयाम युवा क्लब, आरआरएफसी हेटौंडा र पञ्चकन्या युथ क्लब तथा लगनशिल युथ गर्दास र नवदुर्गा एफसी कावासोतीबीच प्रतिस्पर्धा हुनेछ । कैलाश युथ क्लब भरतपु ११ ले आयोजना गरेको प्रतियोगिताको उद्घाटन नेकपा एमाले चितवनकी अध्यक्ष दिल कुमारी रावल (पार्वती) ले गरिन् ।

प्रतियोगितामा चितवन, नवलपरासी र मकवानपुरका ३२ टोलीको सहभागिता छ । सहभागी टोलीलाई दुई समूहमा विभाजन गरिएको छ । समूहका विजेता सोझो फाइनल पुग्नेछन् । कात्तिक १७ गते हुने प्रतियोगिताको विजेताले ४२ र दोस्रो हुने टोलीले २२ हजार रुपैयाँ प्राप्त गर्ने प्रतियोगिता संयोजक सविन अधिकारीले जानकारी दिए ।