काठमाडौं (हाम्रो खेलकुद)– अर्को महिना आयोजना हुने धारा नेपालगन्ज म्याराथनमा महानायक राजेश हमालको उपस्थिति रहने भएको छ । नेपालगञ्ज म्याराथन तथा क्रिएटिभ ह्याण्ड्सले ले हरेक वर्ष आयोजना गर्ने म्याराथन यसपटक मंसिर ४ गते हुँदैछ ।

सरकार र तत्कालिन बिद्रोही माओवादीबीच मंसिर ५ गते भएको बृहत शान्ती सम्झौताको स्मरणमा म्याराथन आयोजना हुँदै आएको छ । युवा पुस्ताका प्रेरणाका श्रोतमा रुपमा रहेका राजेश हमालको उपस्थितिले म्याराथनका आयोजकसँगै प्रायोजक, स्थानिय सहयोगी संघ, संस्था र स्थानियहरुको पनि हौसला बढ्ने विश्वास लिएको आयोजक नेपालगन्ज म्याराथनका संस्थापक अध्यक्ष टीएस ठकुरीले बताएका छन् ।

ठकुरी, राष्ट्रिय क्रिकेट टोलीका पूर्व कप्तान एलबी क्षेत्री, नेपालगन्ज म्याराथनका संस्थापक सदस्य जनकले बुधबार महानायक हमाललाई म्याराथनमा उपस्थितिका लागि निमन्त्रणा गरेको र उनले त्यसलाई स्वीकार गरेको बताइएको छ । हमालले आफू म्याराथनमा उपस्थित हुनका लागि उत्साहित रहेको पनि भेटका क्रममा बताएको ठकुरीले जानकारी दिए । आयोजक संस्थानका अनुसार नेपालमा आयोजना हुने स्थापित म्याराथनमा महानायक हमालको उपस्थिति हुन लागेको सम्भवत यो पहिलो अवसर हुनेछ ।

विगतमा जसरी केएल दुगड ग्रुपको उत्पादन धारा तेल नेपालगञ्ज म्याराथनको मुख्य प्रायोजक यथावत रहेको छ । सातौं धारा नेपालगञ्ज म्याराथनमा आशिर्वाद पेन्ट्स, शिखर प्लाई, राष्ट्रिय बाणिज्य बैंक, फोन पे म्याराथनमा प्रत्यक्ष जोडिएको बताएको छ ।

कोरोनाका कारण गत वर्ष फुल म्याराथन र हाफ म्याराथन मात्र आयोजना गर्न सकिएको उल्लेख गर्दै नेपालगन्ज म्याराथनले यसपटक विगतमा जस्तै दश वटा इभेन्ट हुनेछन् । जसमा म्याराथन(४२.१९५किमी), हाफ म्याराथन(२१ किमी), १० किलोमिटर पुरुष खुल्ला, ५ किलोमिटर महिला खुल्ला, ५ किलोमिटर स्कूलस्तरीय छात्र, ३ किलोमिटर स्कूल स्तरीय छात्रा, किड्स रन (८ देखि १२ वर्ष), २ किलोमिटर कर्पोरेट रन, वाकाथन र ह्वीलचियर प्रतिस्पर्धा रहेको बताइएको छ ।