अर्जुन कार्की, बागलुङ

गल्कोट नगरपालिकाले दोस्रो ढोरपाटन मेयर रनिङ गोल्डकप भलिबल प्रतियोगिताको उपाधि जितेको छ । बागलुङ जिल्लाको ढोरपाटन नगरपालिका र बुर्तिबाङ राइजिङ क्लबको संयुक्त आयोजनामा भएको प्रतियोगिताको पुरुष तर्फको फाइनलमा बुधबार आयोजक ढोरपाटनलाई ३–२ को सेटमा पराजित गर्दै गल्कोटले उपाधि जितेको हो ।

त्रिभुवन आमीृ क्लबका अधिकांश खेलाडी समावेश गल्कोटले तथा शसस्त्र प्रहरीको एपिएफ र आर्मीका खेलाडी समावेश ढोरपाटनबीचको खेलबीच तिब्र प्रतिस्पर्धा भएको थियो । गल्कोट २६–२४,२२–२५,२७–२५,२२–२५ र १५–१३ ले विजयी भएको थियो ।

गल्कोट नगरपालिकामा नेपाल आर्मीका धन बहादुर भट्ट, हरि अधिकारी, मान बहादुर श्रेष्ठ, दुर्गा खड्का र राजेन्द्र विष्ट सहित गण्डकी प्रदेशका सुजन चोखाल र राजन दर्लामी मगर समावेश थिए । यस्तै ढोरपाटन नगरपालिकाको टिममा एफिएफ क्लबका रुपेन्द्र गैरे, दुर्गा सुनार, विजय मगर, सुनिल मगर र आर्मीका दिल सुनारको सहभागी थिए ।

बुधबार भएको महिला भलिबल प्रतियोगिताको उपाधि तमानखोला गाउँपालिका (ए)ले जितेको छ । फाइनल खेलमा तमानखोला गाउँपालिका (बी)लाई ३–० को सोझो सेटमा पराजित गर्दै उपाधि जितेको हो । विजयी टोलीमा आर्मीकी स्पाइकर एवम् राष्ट्रिय महिला भलिबल टिमकी सदस्य साफिया पुन समावेश भएकी थिइन् ।

गल्कोट नगरपालिकाले उपाधिसहित १ लाख १ हजार १ सय ११ र ढोरपाटन नगरपालिकाले ६१ हजार १ सय ११ रुपैयाँ प्राप्त गर्यो । महिला तर्फको विजेता तमानखोला गाउँपालिकाले (ए)ले ६१ हजार १ सय ११ रुपैयाँ र तमानखोला गाउँपालिका (बी)ले ४१ हजार १ सय ११ रुपैयाँ प्राप्त गर्यो ।