काठमाडौं (हाम्रो खेलकुद) – १३ औं दक्षिण एसियाली खेलकुद (साग) का स्वर्ण पदक विजेता भुपेन्द्र थापा आइवा पुरुष विश्व बक्सिङ च्याम्पिनसिपबाट बाहिरिएका छन् ।

सर्बियाको बेलग्रेडमा सुरु भएको च्याम्पियनसिपको दोस्रो दिन मंगलबार ६३.५ केजी तौल समूहमा भुपेन्द्र फ्रान्सेली खेलाडी हामरावीसँग ५–० ले पराजित भइका हुन् । पहिलो चरणअन्तर्गत तेस्रो राउन्ड सम्म चलेको खेलमा भुपेन्द्र २२ वर्षे फ्रान्सेली मुक्कुवाजसँग हारेका हुन् ।

त्यसअघि सोमबार ६७ केजी तौल समूहमा इराकी खेलाडीबाट वाकओभर पाउँदै १३ औं सागका अर्का स्वर्ण पदक विजेता सनिल शाही अन्तिम ३२ मा पुगेका थिए । इराकी खेलाडी इसाम अल अगाइडी रिङमा उपस्थित नभएपछि सनिल स्वत विजेता घोषित भएका हुन् । अब सनिलले बिहीबार आयोजिक सर्बियाका खेलाडीसँग अन्तिम १६ को प्रवेशका लागि प्रतिस्पर्धा गर्नेछन् ।

कात्तिक २० गते सम्म हुने प्रतियोगितामा सनिलसहित ४ नेपाली मुक्केबाजले भाग लिइरहेका छन् । भुपेन्द्र, सनिलसहित १३ औं सागका कास्य पदक विजेता पुरन राईले ५७ केजीमा र रविन थापाले ४८ केजी तौल समूहमा प्रतिस्पर्धा गर्नेछन् । वश्वका १ सय ५ राष्ट्रका ६ सय ५० खेलाडीले १३ वटा तौल समूहमा प्रतिस्पर्धा गर्दैछन् । हरेक तौल समूहको स्वर्ण पदक विजेताले एक लाख, रजत पदक जित्ने ५० हजार र कास्य पदक जित्ने दुर्ई खेलाडीले २५ हजार अमेरिकी डलर प्राप्त गर्नेछन् ।