काठमाडौं (हाम्रो खेलकुद) – १३ औं दक्षिण एसियाली खेलकुद (साग) का स्वर्ण पदक विजेता मुक्केबाज सनिल शाही सर्बियाको बेलग्रेडमा सोमबार सुरु भएको २१ औं आइवा पुरुष विश्व बक्सिङ च्याम्पियनसिप अन्तर्गत ६७ केजी तौल समूहको अन्तिम ३२ मा पुगेको छ ।

नेपाली समय अनुसार सोमबार राती ९ः४५ मा सुरु हुनु पर्ने प्रतिस्पर्धामा इराकी खेलाडी इसाम अल अगाइडी रिङमा उपस्थित नभएपछि सनिल स्वत विजेता घोषित भएका हुन् । अब सनिलले बिहीबार आयोजिक सर्बियाका खेलाडीसँग अन्तिम १६ को प्रवेशका लागि प्रतिस्पर्धा गर्नेछन् । दुई वर्षअघि स्वदेशमा भएको १३ औं सागमा सनिलले ६० केजी तौल समूहमा स्वर्ण पदक जितेका थिए ।

कात्तिक २० गते सम्म हुने प्रतियोगितामा सनिलसहित ४ नेपाली मुक्केबाजले भाग लिइरहेका छन् । १३ औं सागका अर्का स्वर्ण पदक विजेता भुपेन्द्र थापाले ६३.५ कजेीमा, कास्य पदक विजेता पुरन राईले ५७ केजीमा र रविन थापाले ४८ केजी तौल समूहमा प्रतिस्पर्धा गर्नेछन् । भुपेन्द्रले आज दिउँसो फ्रान्सका खेलाडीसँग प्रतिस्पर्धा गर्दैछन् । डिश होमको एक्सन स्पोर्टस एचडी १ ले च्याम्पियनसिपको प्रत्यछ्य प्रसारण गर्नेछ ।

विश्वका १ सय ५ राष्ट्रका ६ सय ५० खेलाडीले १३ वटा तौल समूहमा प्रतिस्पर्धा गर्दैछन् । हरेक तौल समूहको स्वर्ण पदक विजेताले एक लाख, रजत पदक जित्ने ५० हजार र कास्य पदक जित्ने दुर्ई खेलाडीले २५ हजार अमेरिकी डलर प्राप्त गर्नेछन् ।