काठमाडौं (हाम्रो खेलकुद)– दोलखाको चरिकोटमा अर्को झण्डै दुई सातापछि पहिलो हाइ अल्टिच्युट आरडब्लू च्याम्पियनसिप आयोजना हुने भएको छ ।

नेपाल रिङ रेस्लिङ संघ र प्रदेश खेलकुद विकास परिषद्को संयुक्त आयोजना कात्तिक १३ गते चरिकोटको भ्यू टावरस्थित फुटमैदानमा च्याम्पियनसिप आयोजना हुने आइतबार चरिकोटमा पत्रकार सम्मेलनमार्फत जानकारी दिइयो ।

कोभिड महामारीले थलिएको पर्यटन प्रबर्दनका लागि च्याम्पियनसिपले सहयोग पुग्ने अपेक्षा राखेको छ । एक दिनको च्याम्पियनसिपमा नुवाकोटे टाइगर, थाग, डेभिड, साइन, टुप्पी ग्याङ, एक्स हिरो, लेडी एञ्जल, तन्नु, सिजे, एससी, जोनलगायतको अन्य महिला र पुरुष खेलाडीको सहभागिता रहने नेपाल रिङ रेस्लिङ संघकी महासचिव सुवर्ण श्रेष्ठले जानकारी दिइन् ।

२९ लाख रुपैयाँ खर्च हुने अनुमान गरिएको च्याम्पियनसिपमा ५ लाख २५ हजार पुरस्कार रहेको बताइएको छ । च्याम्पियनसिपको हेभी वेट च्याम्पियनले १ लाख ५० हजार, हाइस्कोर च्याम्पियनले १ लाख २० हजार, मिडल वेट च्याम्पियनले ८५ हजार, ट्याग टिम च्याम्पियनले ७५ हजार, लाइटवेट च्याम्पियनले ५० हजार, ट्रिपल थ्रेट च्याम्पियनले ४५ हजार रुपैयाँ प्राप्त गर्नेछन् ।

च्याम्पियनसिप सञ्चालनका लागि आयोजकले राष्ट्रिय खेलकुद परिषद् (राखेप), भिमेश्वर नगरपालिकालगायत दोलखाका स्थानिय तह , नीजि क्षेत्र र अन्यले सहयोग गर्ने अपेक्षा राखेको जनाएको छ । रिङ रेस्लिङ विकासका लागि संघले एकेडेमी सञ्चालन समेत गर्दै आएको छ । संघले गत वर्ष पोखरामा र यसैबर्षको सुरुवातमा नुवाकोटको सूर्य चौरमा च्याम्पियनसिपको आयोजना गरेको थियो । पछिल्लो समय रिङ रेस्लिङको लोकप्रियता बढ्दै गएको संघको दाबी छ ।