बेथानचोक, काभ्रे (हाम्रो खेलकुद) – पुष्पाञ्जली फुटबल क्लब बेथानचोक महाभारत फुटबल कपको सेमिफाइनलमा प्रवेश गरेको छ । बेथानचोक गाँउपालिका वडा नं ५ को कामीडाँडामा मैदानमा बिहीबार भएको क्वार्टरफाइनलमा खानीखोला युवा क्लबलाई टाइब्रेकरमा ५–४ ले हराउँदै पुष्पाञ्जली अन्तिम चारमा पुगेको हो । निर्धारित ६० र थप १० मिनेट गोलरहित बराबरीमा टुंगिएपछि खेल टाइब्रेकरमा गएको थियो ।

बेथान्चोक ६ मेधान्सुका सक्रिय समाज सेवा युवा क्लबले आयोजना गरेको प्रतियोगितामा आयोजक टोली, महांकाल र भुग्देउ ‘बी’ पनि सेमिफाइनलमा पुगेका छन् ।
डिलाइट विजनेस ग्रुप प्रालिका मुख्य प्रायोजक रहेको प्रतियोगितलाई बेथानचोक गाँउपालिकाले समेत आर्थिक सहयोग गरेको छ । डिलाइट विजनेस ग्रुपका अध्यक्ष बेथानचोक ६ का स्थायी बासिन्दा सञ्जय लामा नेपाली कांग्रेसका क्षेत्रिय प्रतिनिधि हुन् ।

कात्तिक २ गते सम्म चल्ने प्रतियोगिताको विजेताले १ लाख १ हजार र दोस्रो हुने टोलीले ५१ हजार रुपैयाँ प्राप्त गर्नेछ । नकआउटका आधारमा सन्चालन भएको प्रतियोगितामा १८ टोली सहभागिता रहेको प्रतियोगिता संयोजक निमा लामाले जानकारी दिए।

बिहीबार नै नवमीका अवसरमा बेथानचोक नेपाली कांग्रेस गाँउ समितिले आयोजना गरेको चियापानको अवसरमा थप पुष्पाञ्जलीका खेलाडीलाई सफलताको शुभकामनासहित बधाई दिइएको थियो । बेथानचोकका अध्यक्ष समेत रहेका कांग्रेस गाँउसमितिका सभापति प्रेमबहादुर तिमल्सिना, वडा नं ४ का वडा अध्यक्ष लालबहादुर श्रेष्ठ, वडा नं २ का कांग्रेस सभापति एवंम सोही वडाका सदस्य नवराज केसीले खेलाडीको हौसला बढाउँदै थप सफलताको कामना गरे ।